Ońtústik óńirlerdiń sharýalaryna 2,5 mlrd tekshe metrden astam sý jetkizildi – Qazsýshar

ASTANA.KAZINFORM – Sýarý maýsymy bastalǵaly beri elimizdiń ońtústik óńirlerinde ornalasqan egistik alqaptarǵa 2,5 mlrd tekshe metrden astam sý jetkizildi. Bul týraly QR SRIM Sý únemdeý tehnologııalaryn damytý departamentiniń dırektory Berikbol Shatabaıuly Mándibaev habarlady.

– Túrkistan oblysynda 276 myń gektar jerge 1,3 mlrd tekshe metr sý berilse, Qyzylorda oblysynda 105 myń gektar egistikke 950 mln tekshe metr sý jetkizildi. Jambyl oblysynda 31 myń gektar alqapqa 107 mln tekshe metrden astam sý taratyldy. Jetisý oblysynda 18 myń gektar jerge 127 mln tekshe metr sý berilip, onyń ishinde 11 myń gektar jer tolyq ylǵaldandyryldy. Al D. Qonaev atyndaǵy «Úlken Almaty» kanaly arqyly 5 210 gektar egistikke 33 mln tekshe metr sý jetkizildi, – dedi vedomstvo ókili.

Sondaı-aq, onyń aıtýynsha, aýa raıynyń qolaıly bolýy men sýarmaly sýdyń ýaqytyly berilýiniń nátıjesinde Túrkistan oblysynyń dıqandary sáýir aıynyń ortasynda qyryqqabattyń alǵashqy ónimin jınap úlgerse, mamyr aıynyń sońǵy onkúndiginde qaýyn, al maýsym aıynyń alǵashqy aptasynda qarbyz jınaýǵa kirisken.

Berikbol Mándibaevtyń málimetinshe, bıyl «Qazsýshar» fılıaldary sharýalarmen sý jetkizýge qatysty 20 402 kelisimshart jasasqan.

– Atalǵan uıymnyń fılıaldary tek kelisimshart jasaǵan sharýalarǵa ǵana sý jetkizetinin eskerte ketken jón, – dedi ol.

Aıta keteıik, Sý resýrstarynyń ulttyq aqparattyq júıesiniń tórt modýli pılottyq rejımde iske qosylǵanyn habarlaǵanbyz. 

Sondaı-aq Sý resýrstaryn basqarýdaǵy yntymaqtastyq: SUEZ Qazaqstanda jumys isteýge daıyn ekenin jazǵanbyz.