Ońtústik óńirlerdiń damýy talqylandy: qaı eldi mekenderdi birinshi qarjylandyrý kerek
ASTANA. KAZINFORM — Premer-Mınıstrdiń orynbasary Qanat Bozymbaev Taraz, Jambyl, Túrkistan, Qyzylorda oblystary men Shymkent qalasynyń ákimderimen ońtústik óńirlerdiń damýyn talqylady. Bul týraly Úkimettiń baspasóz qyzmeti habarlady.
Qanat Bozymbaev jumys saparymen Jambyl oblysyna keldi. Taraz qalasynda Premer-Mınıstrdiń orynbasary eldiń ońtústik óńirleriniń áleýmettik-ekonomıkalyq damýy jáne «Aýyl amanaty» jobasyn iske asyrý máseleleri boıynsha keńes ótkizdi.
Keńeske Jambyl oblysynyń ákimi Erbol Qarashókeev, Túrkistan oblysynyń ákimi Nuralhan Kósherov, Qyzylorda oblysynyń ákimi Nurlybek Nálibaev, Shymkent qalasynyń ákimi Ǵabıt Syzdyqbekov, sondaı-aq Ulttyq ekonomıka vıtse-mınıstri Baýyrjan Omarbekov pen Qarjy vıtse-mınıstri Abzal Beısenbekuly qatysty.
Ákimdikterge jańa Bıýdjet kodeksi aıasynda Óńirlik standarttar júıesin eskere otyryp, bıýdjettik josparlaý erejeleri túsindirildi.
— 2024 jyldyń qorytyndysy boıynsha Óńirlik standarttar júıesi boıynsha nysandarmen jáne qyzmettermen qamtamasyz etý deńgeıi: Jambyl oblysynda — 74,1% (el boıynsha 4-oryn), Túrkistan oblysynda — 66,3% (14-oryn), Qyzylorda oblysynda — 66,8% (6-oryn), Shymkent qalasynda — 87,9% (2-oryn). Jalpy alǵanda, barlyq ońtústik óńirlerde bul kórsetkish respýblıkalyq ortasha deńgeıden — 66,1% joǵary, — delingen habarlamada.
Ońtústik óńirlerdegi ekonomıkalyq ósýdiń negizgi qozǵaýshy kúshi — aýyl sharýashylyǵy, shaǵyn jáne orta bıznes. Bul óńirler azyq-túlik ónimderiniń iri óndirýshileri jáne eldiń azyq-túlik qaýipsizdigin qamtamasyz etýge úles qosyp otyr. Degenmen, óńirler úshin negizgi máselelerdiń biri — ınfraqurylymdy jańǵyrtý.
Keńes barysynda Qanat Bozymbaev ınfraqurylymdyq jobalardy josparlaý Óńirlik standarttar júıesiniń kórsetkishterin qatań eskere otyryp júzege asyrylýy qajet ekenin eske saldy.
Óńirlik deńgeıdegi teńgerim men aıyrmashylyqtardy azaıtý maqsatynda vıtse-premer ákimdikterge Ulttyq ekonomıka mınıstrliginiń bıýdjettik ınvestıtsııalyq jobalardy basymdyq boıynsha irikteý jónindegi ádistemelik usynymdaryn eskere otyryp, artta qalǵan eldi mekenderdi birinshi kezekte qarjylandyrý týraly sheshim qabyldaýdy tapsyrdy.
«Aýyl amanaty» jobasy aıasynda Jambyl oblysynda shamamen 10 myń jumys ornyn qurýdy kózdeıtin boljamdy ınvestıtsııalyq jobalar, Qyzylorda oblysynda 8 myń jumys ornyn, Túrkistan oblysynda 23 myń jumys ornyn qurýǵa baǵyttalǵan jobalar qalyptastyryldy.
Qanat Bozymbaev olardyń iske asyrylýyn jedeldetýdi tapsyrdy. Ulttyq ekonomıka mınıstrligine Qarjy, Eńbek jáne halyqty áleýmettik qorǵaý mınıstrlikterimen jáne oblys ákimdikterimen birlese otyryp, «Aýyl amanaty» jobasyn qarjylandyrý máselesin pysyqtaýdy tapsyrdy.
Sapar aıasynda Kanat Bozymbaev Qazaq ulttyq sý sharýashylyǵy jáne melıoratsııa ýnıversıtetine baryp, oqý ornynyń oqytýshylarymen kezdesti. Keıin Taraz qalasyndaǵy jańa shaǵynaýdandaǵy kópqabatty turǵyn úılerdiń qurylysy jáne Túıte kanaly jaǵalaýyn abattandyrý jumystarymen tanysty.
Aıta ketelik búgin Oljas Bektenov Almaty taý klasterin odan ári damytý tásilderimen tanysqan edi.