Ońtústik óńirlerde shegirtke qaptap ketkeni ras pa

ASTANA.KAZINFORM -  Áleýmettik jelilerde Qazaqstannyń ońtústik óńirlerinde shegirtke qaptady degen aqparat tarady. Alaıda bul málimetter shyndyqqa janaspaıdy, dep málimdedi Aýyl sharýashylyǵy mınıstrliginiń resmı ókili Oljas Tlebaldın. 

Onyń aıtýynsha, azamattar burynǵy jyldary túsirilgen nemese basqa elderde túsirilgen vıdeolardy jarııalap jatyr. Bul kadrlar naqty jaǵdaıdy burmalap kórsetedi. 

— Bıyl úıirli shegirtkeler 2,1 mln gektarǵa deıin jaıylýy múmkin dep boljanǵan. 20 mamyrdaǵy jaǵdaı boıynsha 2,3 mln gektardan astam aýmaq zerttelip, 429 myń gektar jerge hımııalyq óńdeý júrgizildi. Túrkistan jáne Jambyl oblystarynda marokkalyq shegirtkege qarsy óńdeý jumystary 95% aıaqtaldy, qazir qosymsha tazartý júrgizilip jatyr. 11 óńirde ıtalıandyq prýs pen azııalyq shegirtkemen kúres jalǵasyp jatyr. Monıtorıngke 4600-den astam maman tartylǵan. Qorǵanys sharalarynda zamanaýı, joǵary tıimdi pestıtsıdter qoldanyldy, — dedi Oljas Tlebaldın.

Sondaı-aq, jumysqa 443 arnaıy tehnıka jumyldyryldy. Óńirlerde oblys ákimderi orynbasarlarynyń basshylyǵymen jedel shtabtar quryldy. Jaǵdaı memlekettik ınspektsııa komıtetiniń turaqty baqylaýynda, dep qorytyndylady Tilebaldın.

Aıta ketelik shegirtkemen kúreske 7,1 mlrd teńge jumsalatyny týraly jazǵan edik.