Ońtústik óńirlerde 103 ırrıgatsııa kanalyn avtomattandyrý bastaldy

Sonymen qatar buǵan deıin rekonstrýktsııadan ótken jalpy uzyndyǵy 1 184 shaqyrym bolatyn 270 kanaldy avtomattandyrý jumystary júrgizilip jatyr. Budan bólek, sýarý kanaldaryn avtomattandyrý elementterimen jáne sýdy esepke alýdyń zamanaýı júıelerin engize otyryp, rekonstrýktsııalaýǵa arnalǵan 264 joba ázirlenip jatyr.

– Tsıfrlyq quraldardy engizý sý resýrstaryn basqarýdyń keshendi ári kópdeńgeıli júıesin josparly túrde qalyptastyrýǵa múmkindik beredi. Bul ekonomıkanyń túrli salalarynyń turaqty damýyn qamtamasyz etýge, eldiń sý qaýipsizdigine kepildik berýge jáne resýrstardy bolashaq urpaq úshin saqtaýǵa múmkindik beredi, – dedi Sý resýrstary jáne ırrıgatsııa vıtse-mınıstri Aslan Abdraımov.

Aıta keteıik, mınıstrlik Sý resýrstarynyń ulttyq aqparattyq júıesin (SRUAJ) ázirledi. Júıede sý nysandary, sý sharýashylyǵy ınfraqurylymy, sý paıdalanýshylar, jerasty sýy jáne salanyń basqa da elementteri týraly derekter biriktirilgen.

Onyń negizgi mindeti – basqarýshylyq sheshimder qabyldaý úshin biryńǵaı, naqty ári ózekti derekter bazasyn qalyptastyrý. Qazirgi tańda júıede 23 myńnan astam sý nysanynyń derekteri tsıfrlandyrylyp, qurylymdaldy.

Olardyń qatarynda 17 758 ózen, 3 148 kól jáne 1 207 gıdrotehnıkalyq nysan bar. Sý paıdalanýdyń ashyq ári aıqyn tetikterin engizý aıasynda sý arnalary arqyly sý berý boıynsha tutynýshylarmen elektrondy sharttar jasasýdy jáne sý resýrstaryn avtomatty túrde esepteýdi kózdeıtin bıllıng júıesi ázirlenip, paıdalanýǵa berildi.

Sý resýrstary jáne ırrıgatsııa mınıstrligi málimetinshe, qazirgi ýaqytta shart jasasý protsesi tolyqtaı elektrondy formatqa kóshirildi. Jyl basynan beri 29 myńnan astam kelisimge qol qoıyldy.

Aıta keteıik, Aqtóbede eki jyl burynǵy sý tasqyny kezinde jaramsyz bolyp qalǵan kópir jańartyldy.