Ońtústik Koreıanyń joıǵysh ushaqtary qatelesip turǵyn úıdi bombalady

ASTANA. KAZINFORM — Beısenbi kúni Ońtústik Koreıa Áskerı-áýe kúshteriniń eki KF-16 joıǵysh ushaǵy jaýyngerlik jattyǵýlar kezinde polıgon syrtyna qatelesip segiz bomba tastaýy saldarynan jeti adam jaraqat aldy, dep habarlaıdy Yonhap aqparat agenttigi.

Bıliktiń habarlaýynsha, jergilikti ýaqyt boıynsha tańǵy saǵat 10 shamasynda Seýlden soltústikke qaraı 40 shaqyrym jerde ornalasqan Phochhon qalasyndaǵy úıdiń mańynda jolǵa snarıad túskeni týraly aqparat kelgen. Saldarynan jeti adam ártúrli aýyrlyq dárejesinde jaraqat alǵan, shirkeý men taǵy alty ǵımarat qırady.

Órt sóndirý qyzmetiniń habarlaýynsha, zardap shekkenderdiń ekeýiniń aýyr jaraqat alǵan, jaraqat alǵandardyń kóbiniń súıekteri synǵan.
Oqıǵa kezinde júk kóligi de búlindi.

Zardap shekken jeti adamnyń barlyǵy medıtsınalyq kómek alý úshin aýrýhanalarǵa jetkizildi.

Áskerıler jaýyngerlik jattyǵýlarǵa qatysqan KF-16 joıǵysh ushaqtary tańǵy saǵat 10:04–te Phochhon polıgonynyń syrtyna baıqaýsyzda árqaısy tórt MK-82 bombasyn tastaǵan. 

Áskerı-áýe kúshteri oqıǵanyń tergelip jatqanyn málimdep, beıbit turǵyndardan keltirilgen zııan úshin keshirim surady.

— Biz bombalardyń abaısyzda laqtyrylýy saldarynan beıbit turǵyndarǵa keltirilgen kez kelgen zııan úshin ókinish bildiremiz jáne zardap shekkenderdiń tezirek saýyǵyp ketýin tileımiz. Biz barlyq qajetti sharany qoldanamyz, sonyń ishinde keltirilgen zalaldyń ornyn toltyramyz, — delingen VVS málimdemesinde.

Buǵan deıin Ońtústik Koreıanyń Chhonan qalasynda kólik magıstrali qurylysy alańynda kópir opyrylyp qulaǵany týraly jazǵan bolatynbyz.

Kópirdiń opyrylýy saldarynan eki jumysshy qaza taýyp, jeteýi jaraqat alǵan.