Ońtústik Koreıanyń joǵary oqý oryndary halyqaralyq baǵytty nyǵaıtady
ASTANA. KAZINFORM — Ońtústik Koreıa ýnıversıtetteri sheteldik stýdentterdi tartýǵa kúsh salyp, olardyń elde bilimin jalǵastyryp, kásibı turǵyda damýyna jaǵdaı jasaýǵa basymdyq berip otyr. Bul týraly Kazinform agenttigi The Korea Times basylymyna silteme jasap habarlaıdy.
Buǵan bıyl eldegi 60 joǵary oqý ornyn qamtyǵan The Korea Times University Rankings 2027 reıtıngi de dálel bola alady.
Dástúrli ýnıversıtet reıtıngterinen ereksheligi, bul zertteýde oqý oryndarynyń akademııalyq kórsetkishteri men sheteldik stýdentter sany ǵana emes, olardyń halyqaralyq ortaǵa qanshalyqty beıimdelgeni de baǵalanady. Atap aıtqanda, bilim berý sapasy, sheteldik stýdentterge kórsetiletin qoldaý, ǵylymı-zertteý jumystary, sheteldik oqytýshylardyń úlesi jáne túlekterdiń nátıjeleri eskeriledi.
Zertteý nátıjesi Koreıa ýnıversıtetteriniń basty artyqshylyǵy bilim berý sapasy ekenin kórsetti. Al stýdentterge kórsetiletin qoldaý men túlekterdiń oqý aıaqtalǵannan keıingi jetistikteri bul kórsetkishten keıin tur. Bul sheteldik stýdentterge tek oqý ornyna qabyldanǵan kezde ǵana emes, búkil bilim alý kezeńinde jáne oqý bitirgennen keıin de jan-jaqty qoldaý kórsetý máselesi áli de ózekti ekenin ańǵartady.
Bıyl baǵalaý ádistemesine sheteldik oqytýshylardyń úlesi degen jańa kórsetkish engizildi. Al ýnıversıtetterdiń ǵylymı jetistikteri úsh jyldyq kezeń boıynsha baǵalana bastady. Osylaısha basty nazar sheteldik stýdentter sanyn kóbeıtýge ǵana emes, olardyń bilim alý sapasy men oqýyn aıaqtaǵannan keıingi múmkindikterine de aýdarylyp otyr.
The Korea Times University Rankings 2027 reıtınginde ekinshi jyl qatarynan Koreıa ýnıversıteti kósh bastady. Ol 200 múmkin upaıdyń 149,52-sin jınaǵan. Ekinshi orynda 142,22 upaımen Seýl ulttyq ýnıversıteti, úshinshi orynda 140,74 upaımen Ense ýnıversıteti tur.
Reıtıng el óńirleri arasynda aıtarlyqtaı alshaqtyq bar ekenin de kórsetti. Halyqaralyq orta qalyptastyrý kórsetkishi boıynsha eń joǵary nátıje kórsetken 30 ýnıversıtettiń 23-i Seýlde, Kengıdo provıntsııasynda nemese Inchhonda ornalasqan. Bul sheteldik stýdentterdi tartý múmkindigi men halyqaralyq bilim berý ortasyn damytý áleýeti ázirge negizinen eldiń astanalyq óńirinde shoǵyrlanǵanyn kórsetedi.
Zertteý avtorlarynyń aıtýynsha, endigi mindet — koreı ýnıversıtetteriniń sheteldik stýdentter sanyn jaı ǵana kóbeıtýmen shektelmeı, olardyń bilim alýyna, ǵylymı-zertteý jumystarymen aınalysýyna, kásibı jolyn qalyptastyrýyna jáne keıin koreı qoǵamyna etene aralasýyna múmkindik beretin jaǵdaı jasaý. Aldaǵy jyldary reıtıngti baǵalaý ádistemesine sheteldik stýdentter men oqytýshylarǵa arnalǵan ınfraqurylym, halyqaralyq ǵylymı yntymaqtastyq, stýdentterdiń oqý úderisine qanaǵattaný deńgeıi jáne túlekterdiń nátıjeleri sııaqty jańa kórsetkishter engizý josparlanyp otyr.
Buǵan deıin Qazaqstan men Koreıa joǵary bilim jáne jasandy ıntellekt baılanysyn kúsheıtetini habarlanǵan bolatyn.
Aqzat Jıenalına
