Ońtústik Koreıanyń prezıdenti mindetin atqarýshy Han Dok Sý otstavkaǵa ketti

ASTANA. KAZINFORM – Jergilikti ýaqyt boıynsha 1 mamyr kúni tústen keıin, Ońtústik Koreıanyń Premer-mınıstri ári Prezıdent mindetin atqarýshy Han Dok Sý halyqqa arnaǵan úndeýinde otstavkaǵa ketkenin jarııalady. Bul týraly The Paper aqparattyq portaly habarlady.

Belgili bolǵandaı, Han Dok Sý tez aıaqtalǵan shaǵyn rásiminen keıin Úkimet ǵımaratynan ketken. Ol Ońtústik Koreıanyń kezekti prezıdent saılaýyna qatysatynyn aldaǵy kúnderi resmı túrde málimdemek.

Búgin, sondaı-aq, eldegi tórt iri áleýmettik zertteý ınstıtýty birlesip júrgizgen saýalnamanyń nátıjesi jarııalandy. Oǵan sáıkes, prezıdenttik saılaýdaǵy basty úmitkerlerdiń ishinde Birikken demokratııalyq partııa usynǵan Lı Chje Men 42% qoldaýǵa ıe bolyp, kósh bastap tur. Han Dok Sý 13% kórsetkishpen ekinshi orynǵa jaıǵasty. «Halyq kúshi» partııasy atynan saılaýǵa túsýge nıetti Han Don Hýn men Kım Mýn Sý sáıkesinshe 9% jáne 6% qoldaýǵa ıe bolǵan.

Sondaı-aq, saýalnamaǵa qatysýshylardyń 2%-y Jańa reforma partııasynan Lı Chjýn Sokti qoldaǵan.

Buǵan deıin Ońtústik Koreıa prokýratýrasynyń eldiń burynǵy prezıdenti Mýn Chje Indi para aldy degen aıyppen sotqa bergenin jazǵan edik.