Ońtústik Koreıanyń ońtústik-shyǵysynda orman órti tolyq sóndirildi
SEÝL. KAZINFORM – Ońtústik Koreıa bıligi 21 naýryzdan beri órship turǵan orman órtin tolyqtaı aýyzdyqtady. Bul týraly eldiń Іshki ister jáne qaýipsizdik mınıstrligi habarlady, dep jazady TASS.
Іshki ister mınıstriniń mindetin atqarýshy Ko Kı Donnyń basshylyǵymen Kensan-Pýkto, Kensan-Namdo provıntsııalarynda jáne Ýlsan qalasynda (munda buǵan deıin tótenshe jaǵdaı rejımi engizilgen) ótken keńeste órtke qarsy sharalar talqylanǵan.
— Búgin jergilikti ýaqytpen 13:00–de (Astana ýaqytymen 09:00) Kensan-Namdo provıntsııasynyń Sanchhon ýezindegi basty órt oshaǵy tolyq sóndirildi. Bul jerde órt 21 naýryzda bastalǵan. Osylaısha, barlyǵy 11 órt oshaǵynyń jalyny óshirildi, — delingen mınıstrlik habarynda.
Jalyn 48 myń gektar aýmaqty sharpyǵan, bul — jergilikti BAQ-tyń baǵalaýy boıynsha, shamamen Seýl aýmaǵynyń 80%-yna teń. Ko Kı Don bul órtti el tarıhyndaǵy eń joıqyn apattardyń biri dep atady, óıtkeni ol adam shyǵyny men materıaldyq zalal turǵysynan asa aýyr boldy.
Sońǵy málimetterge sáıkes, 30 adam qaza taýyp, 45 adam jaraqat alǵan. Tilsiz jaý 30 mádenı mura nysanyn joıyp jibergen, dep habarlaıdy Yonhap agenttigi.
30 naýryzda Ońtústik Koreıanyń Orman qyzmeti Kensan-Pýkto provıntsııasyndaǵy órttiń tolyq sóndirilgenin málimdegen. Alaıda, senbi kúni túnde jalyn qaıta órshigen. Sonymen qatar, Ońtústik Koreıa polıtsııasy 56 jastaǵy jergilikti turǵynǵa qatysty tergeý bastady. Ol 22 naýryzda Yıson ýezindegi otbasy zıratynda ata-babalardy eske alý rásimi kezinde órttiń tutanýyna sebep boldy degen kúdikke ilinip otyr.
Aıta keteıik, buǵan deıin Ońtústik Koreıanyń ońtústik-shyǵys óńirin sharpyǵan orman órti saldarynan 18 adam qaza tapqanyn jazǵan edik. Sondaı-aq, órt sóndirý tikushaǵynyń apatqa ushyraýy saldarynan ushqysh kóz jumǵan.
Prezıdent Qasym-Jomart Toqaev Koreıa halqyna kóńil aıtty.