Ońtústik Koreıanyń eks-prezıdenti ıÝn Sok El altynshy ret sotqa kelmedi

ASTANA. KAZINFORM – Ońtústik Koreıanyń eks-prezıdenti ıÝn Sok El beısenbi kúni qastandyq isi boıynsha kezekti sot tyńdaýyna taǵy da qatysqan joq, dep habarlaıdy Yonhap.

10 shildede ekinshi márte qamaýǵa alynǵannan beri ıÝn Sok El Seýldiń ortalyq aýdandyq sotyndaǵy tyńdaýlarǵa densaýlyǵyna baılanysty kelýden bas tartyp keledi.

Sot beısenbi kúngi otyrysty bastaı otyryp, aıyptalýshynyń taǵy da qatyspaǵanyn málimdedi. Ony qamaýda ustaý mekemesi sotqa májbúrli túrde ákelýdiń qıyndyǵyn túsindirgen resmı habarlama joldady.

Qylmystyq-protsessýaldyq kodeks boıynsha aıyptalýshy zańdy negizsiz sotqa qatysýdan bas tartqan jaǵdaıda, ony májbúrli túrde jetkizý múmkin bolmaǵan ne edáýir qıyndyq týdyrǵan kezde sot protsesin aıyptalýshysyz jalǵastyrýǵa bolady.

Eks-prezıdentke 2024 jylǵy jeltoqsanda qysqa merzimge áskerı jaǵdaı engizý arqyly búlik uıymdastyrdy jáne bılikti teris paıdalandy degen aıyp taǵylyp otyr.

Yonhap atap ótkendeı, qastandyq úshin eń joǵarǵy jaza – ómir boıyna bas bostandyǵynan aıyrý nemese ólim jazasy kózdelgen.

Eske sala keteıik, Seýl soty sársenbi kúni áskerı jaǵdaı engizýge qatysy bar dep aıyptalǵan burynǵy premer-mınıstr Han Dok Sýdyń qamaýǵa alý týraly ótinishin qanaǵattandyrmaǵan bolatyn.