Ońtústik Koreıanyń burynǵy prezıdentiniń saılanýy jaramsyz dep tanylýy múmkin
ASTANA. KAZINFORM — Sársenbi kúni apellıatsııalyq sot Ońtústik Koreıanyń burynǵy prezıdenti ıÝn Sok Eldiń saılaý zańnamasyn buzǵany úshin isi boıynsha sheshim shyǵarýy kerek. Eger sot úkimi kúshine ense, negizgi oppozıtsııalyq partııa saılaý naýqanyna jumsalǵan 30 mıllıon dollarǵa jýyq qarajatty qaıtarýǵa májbúr bolýy múmkin. Bul týraly Yonhap agenttigi jazdy.
Seýl Joǵarǵy sotynyń tyńdaýy saǵat 14:00-ge josparlanǵan jáne ol tikeleı efırde kórsetilmek. ıÝn Sok Elge «Halyqtyń kúshi» partııasynan usynylǵan kandıdat retinde 2022 jyldyń naýryz aıyndaǵy saılaý aldyndaǵy naýqanda jalǵan málimdemeler jasady dep aıyp taǵyldy.
Shilde aıynda aýdandyq sot ıÝn Sok Eldi kináli dep tanyp, ony 18 aıǵa bas bostandyǵynan aıyrý, úsh jylǵa shartty túrde bas bostandyǵynan aıyrý jazasyna kesti. Eger apellıatsııalyq shaǵymdardan keıin úkim kúshine ense, ıÝnnyń saılanýy jaramsyz dep tanylady jáne «Halyqtyń kúshi» partııasy saılaýǵa jumsalǵan 39,7 mıllıard von (29,5 mıllıon dollar) shyǵyndy qaıtarýǵa mindetti bolady.
Saılaý týraly zańǵa sáıkes, eger kandıdaty keminde 15% daýys jınasa, memleket sol partııaǵa saılaý naýqanynyń shyǵyndaryn tolyǵymen óteıdi. Eger sol kandıdat saılaý zańnamasyn buzǵany úshin bas bostandyǵynan aıyrý jazasyna kesilse nemese oǵan keminde 1 mıllıon von aıyppul salynsa, partııalar barlyq qarajatty qaıtarýǵa mindetti. Mundaı jaza olardyń saılaý nátıjelerin de jaramsyz etedi.
ıÝn Sok El 2021 jyldyń jeltoqsanynda ótken baspasóz is-sharasynda advokatyn burynǵy salyq qyzmetkerimen — prokýratýrada jumys istegen kezdegi jaqyn seriktesiniń aǵasymen tanystyrmaǵanyn aıtyp jalǵan málimdeme jasady dep aıyptalǵan. Oǵan taǵylǵan taǵy bir aıyptamaǵa sáıkes, 2022 jyldyń qańtaryndaǵy suhbatynda baqsy Chon Son Bemen partııa qyzmetkeri tanystyrǵanyn aıtyp ótirik aıtqan, sondaı-aq baqsymen áıeli Kım Gon Hımen birge kezdeskenin joqqa shyǵarǵan.
Qamaýda otyrǵan burynǵy prezıdent 2024 jyldyń jeltoqsanynda áskerı jaǵdaı engizbek bolyp, ol áreketi sátsiz aıaqtalǵan bolatyn. Sodan keıin qyzmetinen bosatylyp, birneshe qylmystyq aıyptaý taǵyldy.
Seýldiń ortalyq aýdandyq soty Ońtústik Koreıanyń burynǵy prezıdenti ıÝn Sok Elge 2024 jyldyń jeltoqsanyndaǵy búlik týralyis boıynsha ómir boıy bas bostandyǵynan aıyrý jazasyna kesti.
Artynsha, ıÝn Sok El ómir boıyna sottalý úkimine apellıatsııa berdi.
