Ońtústik Koreıanyń burynǵy prezıdenti taǵy da tutqyndalýy múmkin

ASTANA. KAZINFORM – Arnaıy prokýror Cho Yn Sok Koreıa Respýblıkasynyń eks-prezıdenti ıÝn Sok Eldi tutqyndaý úshin order berýdi surady, dep habarlaıdy reseılik TASS.

Yonhap agenttiginiń habarlaýynsha, 25 maýsym kúni Seýldiń Ortalyq aýdandyq soty arnaıy prokýrordyń order berý týraly ótinishin qanaǵattandyrmady. Arnaıy prokýror sol sotqa qaıta júginip, ıÝn Sok Eldi ókilettigin asyra paıdalaný, qujattardy qoldan jasaý, prezıdent týraly zańdy buzý jáne bılik organdarynyń jumysyna kedergi keltirý baptary boıynsha qamaýǵa alýdy surady.

Bul kúdikterdiń barlyǵy 2024 jyldyń 3 jeltoqsanyndaǵy áskerı jaǵdaıdyń jarııalanýymen baılanysty. ıÝn Sok El memlekettik qurylymǵa qarsy búlik shyǵarý boıynsha qylmystyq bap aıasynda da aıyptalyp otyr.

Yonhap agenttigi atap ótkenindeı, memlekettik opasyzdyq kúdigi order berý týraly ótinishte joq. Ońtústik Koreıada memleketke opasyzdyq jasady dep syrttan basyp kirý áreketi ǵana tanylady.

2024 jyldyń jeltoqsanynan bastap Ońtústik Koreıanyń birqatar buqaralyq aqparat quraly ıÝn Sok El ákimshiligi elde áskerı jaǵdaı engizý úshin shekarada KHDR-men jaǵdaıdy shıelenistirýge áreket etti, degen boljam jarııalaǵan. Arnaıy prokýrordyń ókili memleketke opasyzdyq jasady degen aıyp boıynsha is áli de qaralyp jatqanyn jetkizdi.

Osyǵan deıin Ońtústik Koreıanyń demografııalyq daǵdarys aldynda turǵany týraly jazdyq.