Ońtústik Koreıanyń burynǵy prezıdenti taǵy bir jarym jylǵa bas bostandyǵynan aıyryldy
ASTANA. KAZINFORM – Dúısenbide Seýl soty burynǵy prezıdent ıÝn Sok Eldi 2022 jylǵy prezıdenttik naýqan kezinde jalǵan aqparat berý arqyly saılaý zańnamasyn buzǵany úshin kináli dep tapty, dep habarlady Yonhap aqparat agenttigi.
Sot ıÝn Sok Eldi 2022 jylǵy naýryzdaǵy saılaý aldynda Halyq bıligi partııasynan (HBP) prezıdenttikke kandıdatýrasyn usynǵan kezde jalǵan kýálik bergeni úshin kináli dep tanyǵannan keıin 18 aıǵa bas bostandyǵynan aıyrý jazasyna kesti. Sot úkimin oryndaý úsh jylǵa keıinge qaldyryldy.
Úkim apellıatsııalyq tártipte rastalǵan bolsa, HBP ıÝn Sok Eldiń 2022 jylǵy saılaýda jeńisinen keıin saılaý komıssııasynan naýqan shyǵyndary retinde alǵan shamamen 40 mlrd von qaıtarýy tıis bolady.
Burynǵy prezıdenttiń advokattary sot sheshimindegi kóptegen qatelikti alǵa tartyp, apellıatsııalyq shaǵym túsiretinin málimdedi.
Osyǵan deıin Ońtústik Koreıanyń burynǵy prezıdenti taǵy eki jylǵa bas bostandyǵynan aıyrylǵanyn jazdyq. Sot burynǵy prezıdentti «Saıası qorlar týraly» zańdy buzǵany úshin kináli dep tanydy.
2026 jylǵy aqpanda ıÝn Sok El áskerı jaǵdaı jarııalaý arqyly búlik uıymdastyrǵany úshin ómir boıyna bas bostandyǵynan aıyrylǵan edi. Keıin ol bul úkimge shaǵym túsirdi.
Maýsym aıynda burynǵy prezıdent jaýǵa járdemdesti jáne qyzmettik ókilettigin asyra paıdalandy degen aıyp boıynsha 30 jylǵa bas bostandyǵynan aıyryldy.
Buǵan deıin Ońtústik Koreıanyń Joǵarǵy soty sot tóreligine kedergi keltirdi degen is boıynsha burynǵy prezıdentke shyǵarylǵan jeti jyldyq bas bostandyǵynan aıyrý týraly úkimdi kúshinde qaldyrǵan bolatyn.
