Ońtústik Koreıanyń burynǵy birinshi hanymyna qatysty sot úkimi ózgerdi

Ol qyzmetke taǵaıyndaý men iskerlik máselelerdi sheshýge kómekteskeni úshin qymbat syılyqtar alǵany úshin sottalǵan. 

Seýldiń Joǵarǵy soty Kım Kon Hıge, ıaǵnı Ońtústik Koreıanyń burynǵy prezıdenti ıÝn Sok Eldiń jubaıyna jeti jyl bas bostandyǵynan aıyrý jazasyn taǵaıyndaǵan birinshi satydaǵy sot sheshimin ishinara ózgertti. Apellıatsııalyq sot arnaıy prokýror Mın Chjýn Gıdiń taqqan keıbir aıyptary boıynsha Kım Kon Hıdi kinásiz dep tanydy.

Buǵan deıin arnaıy prokýrorlar toby Kım Kon Hıge taǵylǵan aıyptaýlardyń birinde onyń qurylys kompanııasynyń tóraǵasynan 2022 jylǵy naýryz-mamyr aılary aralyǵynda jalpy quny 100 mıllıon vonnan asatyn (shamamen 73 myń dollar) zergerlik buıymdar alǵanyn kórsetken. Tergeý nusqasyna sáıkes, bul syılyqtar onyń kúıeýbalasyn memlekettik qyzmetke taǵaıyndaýǵa yqpal etýi úshin berilgen.

Buǵan qosa, Kım Kon Hıge 2022 jylǵy sáýirde Ulttyq bilim berý komıssııasynyń burynǵy basshysynan ózine qyzmet taǵaıyndalýyna yqpal etkeni úshin altyn tasbaqa músini men kartınanyń kóshirmesin alǵan degen aıyp taǵylǵan. Sondaı-aq sol jyly pastordan Dior sómkesin, al qyrkúıek aıynda basqa kásipkerden Vacheron Constantin saǵatyn alǵany aıtyldy.

Eldiń burynǵy birinshi hanymyna 2023 jylǵy aqpanda burynǵy prokýrordan belgili sýretshi Lı Ýfannyń kartınasyn alǵan degen de aıyp taǵyldy. Tergeý nusqasyna sáıkes, bul syılyq onyń saılaýǵa kandıdat retinde túsýine járdemdeskeni úshin berilgen.

2026 jylǵy maýsymda Seýl soty Kım Kon Hıdi taǵylǵan barlyq aıyp boıynsha kináli dep tanyp, jeti jylǵa bas bostandyǵynan aıyrǵan bolatyn.

Eske sala keteıik, Ońtústik Koreıanyń burynǵy prezıdenti ıÝn Sok El de elde áskerı jaǵdaı engizýge áreket jasaǵany úshin qamaýda otyr. Oǵan qatysty segiz qylmystyq is qozǵalǵan.

Sonymen qatar 2026 jylǵy shildede Ońtústik Koreıanyń burynǵy prezıdenti taǵy bir jarym jylǵa bas bostandyǵynan aıyryldy.

Aqzat Jıenalına