Ońtústik Koreıanyń BTS toby Spotify platformasynda rekord ornatty
ASTANA. KAZINFORM — Ońtústik Koreıanyń áıgili BTS toby Spotify platformasynda bir jyl ishinde 10 mıllıard tyńdalym jınaǵan álemdegi alǵashqy mýzykalyq top atandy, dep habarlaıdy Yonhap.
BTS tobynyń Spotify platformasyndaǵy ánderi bıyl ótken jylmen salystyrǵanda eki eseden astam tyńdalyp, jalpy tyńdalym sany 9 mıllıardtan asty. Buǵan toptyń 2026 jylǵy naýryzda jaryq kórgen besinshi stýdııalyq albomy — Arirang yqpal etti.
Albom jaryq kórgeli beri Spotify platformasynda 5 mıllıardtan astam ret tyńdalǵan. Osylaısha Arirang 2026 jyly platformada jaryq kórgen albomdar arasynda tyńdarmannyń eń joǵary suranysyna ıe týyndy atandy.
BTS tobynyń Arirang albomy tórt jylǵa jýyq úzilisten keıingi alǵashqy tolyqqandy jobasy retinde kópshiliktiń nazaryn aýdardy. Top músheleri mindetti áskerı qyzmetin aıaqtap, qaıta bas qosqannan keıin jaryq kórgen albom 20 naýryzda, relız kúni, 110 mıllıonnan astam ret oınatyldy.
Aıta keteıik, buǵan deıin Spotify platformasynda bir jyl ishinde 10 mıllıard tyńdalym mejesine Teılor Svıft, Arıana Grande jáne Bad Bunny sekildi jeke oryndaýshylar jetken. Al BTS bul kórsetkishke qol jetkizgen álemdegi alǵashqy mýzykalyq top boldy.
Buǵan deıin BTS tobynyń tanymaldyǵy Ońtústik Koreıaǵa keletin týrıster sanynyń rekordtyq deńgeıge jetýine yqpal etkeni habarlanǵan bolatyn.
