Ońtústik Koreıanyń ákimshilik ortalyǵy týrısterdi tartýǵa basymdyq bermek
ASTANA. KAZINFORM – Ońtústik Koreıanyń ákimshilik ortalyǵy Sedjon qalasy halyqaralyq týrızmdi damytýǵa den qoıyp otyr. Qala bıligi ınfraqurylymdy jetildirip, sheteldik týrıster úshin jańa múmkindikter jasaýdy josparlap otyr, dep habarlaıdy The Korea Times.
Seýlden ońtústikke qaraı shamamen 130 shaqyrym jerde ornalasqan Sedjon qalasynyń negizi 2012 jyly qalanǵan. Qazir munda 400 myńǵa jýyq adam turady. Qalanyń damýy birqatar memlekettik mınıstrliktiń Seýlden kóshirilýimen tyǵyz baılanysty.
Endi Sedjon halyqaralyq konferentsııalar men kórmelerge qatysýshylardy tartýdy, týrıstik baǵdarlamalardy keńeıtýdi jáne sheteldik qonaqtarǵa qolaıly jaǵdaı jasaýdy kózdep otyr.
Qalanyń erekshe kórikti oryndarynyń biri – úkimettik keshenniń tóbesinde ornalasqan uzyndyǵy 3,6 shaqyrymǵa jýyq baq. Ol 15 memlekettik ǵımaratty biriktirip tur. 2016 jyly bul nysan álemdegi eń úlken shatyr baǵy retinde Gınnestiń rekordtar kitabyna engen.
Baq turǵyndar men týrısterdiń serýendep, demalýyna arnalǵan. Onyń bıiginen qalanyń panoramalyq kórinisin tamashalaýǵa bolady.
Sedjonnyń taǵy bir ereksheligi – jerasty qaldyq jınaý júıesi men ózara baılanysqan úkimettik ǵımarattar. Mundaı ınfraqurylym qalanyń «aqyldy qala» tujyrymdamasy negizinde damyp jatqanyn kórsetedi.
Týrıster nazaryn aýdaratyn taǵy bir nysan – Kymgan ózeni arqyly salynǵan uzyndyǵy 1446 metrlik Iyn kópiri. Onyń uzyndyǵy kezdeısoq tańdalmaǵan. Bul san 1446 jyly Sedjon patshanyń koreı álipbıin tanystyrǵan «Hýnmındjonym» eńbeginiń jarııalanýymen baılanysty.
Zamanaýı sáýletimen qatar qalada tarıhı oryndar da saqtalǵan. Máselen, 1931 jyly ashylǵan dástúrli bazar Sedjonnyń eski bóliginde áli kúnge deıin jumys istep tur.
Aldaǵy ýaqytta óńirge týrıster qyzyǵýshylyǵy arta túsedi dep kútiledi. Óıtkeni 2027 jyly Chhýnchhon óńirinde FISU dúnıejúzilik Ýnıversıadasy ótedi.
Aıta keteıik, buǵan deıin BTS tobynyń tanymaldyǵy aıasynda Ońtústik Koreıaǵa keletin týrıster sany rekordtyq deńgeıge jetkeni habarlanǵan bolatyn.
