Ońtústik Koreıanyń 14 mergeni Dúnıejúzilik kóshpendiler oıyndaryna qatysyp jatyr

ASTANA. KAZINFORM – Elordada ótip jatqan Dúnıejúzilik kóshpendiler oıyndaryna Ońtústik Koreıanyń 14 mergen keldi. Kárister sadaq atýdan Parıj Olımpıadasyndaǵy jetistigin qaıtalaı ala ma, eldegi sadaq atý sporty qanshalyqty mańyzdy? Bul týraly Ońtústik Koreıanyń ulttyq sadaq atý birlestiginiń aǵa menedjeri Kım Hen Sý aıtyp berdi. 

«Eń aldymen Dúnıejúzilik kóshpendiler oıynyna ekinshi ret qatysyp otyrǵanymyzǵa óte rızamyz. Oıyndardyń ashylý saltanatyn da tamashaladyq jáne óte joǵarǵy deńgeıdegi is-shara dep baǵaladyq. Sosyn Qazaqstanǵa Keńes odaǵy zamanynda kóptegen kárisdiń qonys aýdarǵanyn bilip otyrmyn. Sol úshin qazaq pen káris birge turyp jatqan el bolǵandyqtan, munda saparlap kelgenimizge óte qýanyshtymyn. Dástúrli sadaq atý jaǵynan kárister áldeqaıda myqtyraq. Parıj Olımpıadasyna barǵan sportshylar da birinshi dástúrli sadaqpen atýdy úırenip, sodan keıin eýropalyq sadaqty úırengen. Kóshpendiler oıyndary men Olımpıadanyń baǵyttary ártúrli bolǵandyqtan, Astanaǵa basqa mergenderimizdi alyp keldik», - deıdi Kım Hen Sý agenttik tilshisine bergen suhbatynda. 

Koreıalyq qonaq óz elinde sadaqtyń eń kemi 7 myń jyldyq tarıhy bar ekenin jetkizdi. 

«Koreıanyń Ýlsan qalasynda ejelgi bir úńgirden sadaqpen kıt atyp jatqan sýret tabylǵan. Bul sýret shamamen 7 myń jyl buryn salynǵan dep jatyr. Káristerdiń sadaǵy basqalardan kishirek, yńǵaıly, sondyqtan da elimizde bul sport keńinen taraǵan. Elimizde 400-ge jýyq sadaq atý ortalyqtary jumys isteıdi. Onda kez kelgen adam sadaqtyń jasalý jolymen tanysyp, tegin jattyǵa alady. Keı mektepterde jasóspirimderge arnalǵan sadaq atý sabaqtary ótkiziledi», - dedi spıker.

Onyń aıtýynsha, kelesi jyly Ońtústik Koreıada sadaq atýdan halyqaralyq jarys ótedi.

«Negizi bul is-shara 19 jyl buryn bastalyp, 9 ret ótkizildi jáne 10 jyl boıy toqtap turdy. Sony qaıtadan jandandyrýdy oılastyryp otyrmyz. Bul ulttyq sadaqqa baılanysty oıyndar bolady. Álemniń túpkir-túpkirinen sportshylardy shaqyryp, ár el óziniń sadaq atý ónerin kórsetip, jarys ótkizetin oıyndar josparlanyp otyr», - deıdi Kım Hen Sý.

Aıta keteıik, keshe Dástúrli sadaq atýdan Pýta nysanasyn kózdeýde qazaqstandyq sportshylar bir altyn, eki qola medal jeńip aldy. 

Búgin Qalqan nysanasyn kózdeýde qazaqstandyq, majarstandyq, úndistandyq, reseılik jáne qyrǵyzstandyq sportshylar fınalǵa shyqty. 

Jalpy komandalyq jarystar 12 qyrkúıek kúni ótedi.