Koreıalyq Boeing-tyń jazý qurylǵylary apatqa 4 mınýt qalǵanda toqtap qalǵan

ASTANA. KAZINFORM – Bul týraly senbi kúni Ońtústik Koreıanyń kólik mınıstrligi málim etti, dep habarlaıdy Kazinform agenttigi VVS-ge silteme jasap.

Bılik «qara jáshik» jazbalarynyń toqtaýyna ne sebep bolǵanyn taldaýdy josparlap otyr. Ázirge ushýdy jazý qurylǵylary AQSh Ulttyq kólik qaýipsizdigi keńesiniń zerthanasyna jiberildi.

2024 jyly 29 jeltoqsanda Bangkoktan Mýanǵa ushqan Jeju Air Boeing 737-800 ushaǵy qustar tobymen soqtyǵysqanyn habarlady, sodan keıin ushyp-qoný jolaǵyna «qarnymen» qonyp, tejele almady.

Ushaq áýejaıdyń beton qorshaýyna soǵylyp, órtenip ketken.

Osyǵan deıin Ońtústik Koreıanyń Mýan halyqaralyq áýejaıynda bortynda 181 adamy bar jolaýshylar ushaǵy apatqa ushyrap, kem degende 47 adam qaza taýyp, taǵy kóp adam jaralanǵanyn jazǵan bolatynbyz.

Ońtústik Koreıa prezıdentiniń mindetin atqarýshy, vıtse-premer-mınıstr Choı Sang Mok Mýan áýejaıynda bolǵan ushaq apatyna baılanysty bir aptalyq aza tutý kúnin jarııalady.

Jyl basynda Ońtústik Koreıada apatqa ushyraǵan ushaqtyń «qara jáshiginen» derekter alyndy.