Ońtústik Koreıadaǵy zańdy jumysqa el azamattary qashan bara alady
ASTANA. KAZINFORM – QR Eńbek jáne halyqty áleýmettik qorǵaý mınıstri Asqarbek Ertaev Qazaqstan azamattarynyń Ońtústik Koreıadaǵy zańdy jumysyn qamtamasyz etý protsesin túsindirdi.
Búgin Úkimet otyrysynan keıingi baspasóz máslıhatynda Qazaqstan men Ońtústik Koreıa arasynda EPS júıesin engizý qashan aıaqtalatyny suraldy.
- Atalǵan eldiń Úkimetimen kelissózder (EPS júıesine engizýdiń úsh kezeńi bar) jalǵasyp jatyr. Birinshi kezeńinen ótken edik. Al ekinshi kezeńdi eńserý osy jazdyń aıaǵyna deıin josparlandy. Bul máseleler Ońtústik Koreıanyń jaýapty mınıstrliginiń qaraýynda jatyr. Bul rette Almaty qalasynda EPS ortalyǵyn ashýǵa tıisti ǵımaratty bekitýge qatysty suraý aldy. Bir ǵımaratty olarǵa usyndyq. Eger osy nysanǵa kelisimin berse, úshinshi kezeńge ótemiz. Barlyǵy kelisimnen ótse, bul taqyryp Ońtústik Koreıa Premer-mınıstr deńgeıinde qaralady, - dedi A.Ertaev.
Onyń aıtýynsha, atalǵan kelisimdi bekitý tek Qazaqstanǵa baılanysty emes. Bul baǵyttaǵy qujattar ýaqytyly tapsyrylǵan.
- Qujattardy qarap bolsa, qujatqa qol qoıýǵa kirisemiz, - dedi mınıstr.
Eske salsaq, biraz jyldan beri Ońtústik Koreıada Qazaqstan azamattary zańsyz júrgeni jaıynda aıtylyp keledi. Eńbek mınıstrliginiń basshylyǵy Qazaqstan azamattarynyń zańdy túrde jumys isteýine qatysty is-sharalar 2024 jyldyń sońyna deıin aıaqtalýy múmkin ekenin aıtqan edi. Odan beri bir jyldan astam ýaqyt ótti.
Aıta keteıik, EPS júıesi (Employment Permit System) óz jumysyn 2004 jyldyń 1 tamyzynda bastady jáne qazirge deıin bul júıe boıynsha 20-ǵa jýyq eldiń azamaty Ońtústik Koreıada jumys isteı alady.
Bul júıedegi jumys qyzmet kórsetý, óndiris, qurylys, aýyl sharýashylyǵy jáne balyq aýlaý salalarynda usynylady. EPS júıesi sheteldikke Ońtústik Koreıada 3 jylǵa deıin jumys isteýge múmkindik beredi, sondaı-aq jumysshylarmen kelisimshart uzartylýy múmkin.
Bul azamattarǵa osy elde 4 jyl 10 aıǵa deıin turýǵa múmkindik beredi. EPS júıesine qatysý úshin Koreıa jaǵy EPS daıyndyq ortalyqtaryna barýdy talap etedi. Bul ortalyqtarda Ońtústik Koreıada jumysqa ornalasqysy keletinder til úırený kýrstarynan, kóshi-qon jáne medıtsınalyq máselelerge qatysty testileýden ótedi.
