Ońtústik Koreıadaǵy zańdy jumys: kelissóz qashan aıaqtalady
ASTANA. KAZINFORM – QR Eńbek jáne halyqty áleýmettik qorǵaý mınıstri Asqarbek Ertaev Qazaqstan azamattarynyń Ońtústik Koreıadaǵy zańdy jumysy máselesin sheshý jónindegi kelissóz qaı deńgeıde ekenin túsindirdi.
Onyń aıtýynsha, bul kelissózderdiń uzaq júrýine Ońtústik Koreıa basshylyǵynyń aýysýyna qatysty bolǵan protsess áser etken.
- Kelissózderdiń (EPS júıesine engizý) úsh kezeńi bar. Biz birinshi kezeńinen ótken edik. Alaıda Ońtústik Koreıa prezıdentiniń aýysýyna baılanysty osy másele jarty jylǵa turalap qaldy. Jańa prezıdent qyzmetine kiriskennen keıin bul eldegi eńbek mınıstrligi osy jumystardy jandandyrdy. Qazir ekinshi kezeń aıasynda kelissózdi jalǵastyryp jatyrmyz. Bul rette Almaty qalasynda EPS ortalyǵyn ashý josparlanǵan. Olar osy ǵımarattardy qarap, belgiledi. Endi sol ǵımaratta EPS ortalyǵyn ashýǵa ákimshilikpen tıisti jumysty júzege asyryp jatyrmyz. Bul aqparattyń bárin Koreıaǵa joldadyq. Barlyǵy kelisimnen ótse, onda olar kelissózdi Premer-mınıstr deńgeıindegi úshinshi kezeńge shyǵarady, - dedi A.Ertaev Úkimettegi baspasóz máslıhatynda.
Osy oraıda mınıstr Ońtústik Koreıa Qazaqstandy EPS júıesine engizý týraly túpkilikti sheshim qabyldaýǵa kirisetinin aıtty. Bul is-sharalar jyl sońyna deıin aıaqtalýy múmkin.
- Olarmen turaqty baılanystamyz. Qazaqstan Elshiligi erekshe mán berip otyr. Bul elde 10 myń Qazaqstan azamaty zańsyz júr, - dedi vedomstvo basshysy.
Eske salsaq, biraz jyldan beri Ońtústik Koreıada Qazaqstan azamattary zańsyz júrgeni jaıynda aıtylyp keledi. Eńbek mınıstrliginiń basshylyǵy Qazaqstan azamattarynyń zańdy túrde jumys isteýine qatysty is-sharalar 2024 jyldyń sońyna deıin aıaqtalýy múmkin ekenin aıtqan edi. Odan beri bir jyldan astam ýaqyt ótti.
Aıta keteıik, EPS júıesi (Employment Permit System) óz jumysyn 2004 jyldyń 1 tamyzynda bastady jáne qazirge deıin bul júıe boıynsha 20-ǵa jýyq eldiń azamaty Ońtústik Koreıada jumys isteı alady.
Bul júıedegi jumys qyzmet kórsetý, óndiris, qurylys, aýyl sharýashylyǵy jáne balyq aýlaý salalarynda usynylady. EPS júıesi sheteldikke Ońtústik Koreıada 3 jylǵa deıin jumys isteýge múmkindik beredi, sondaı-aq jumysshylarmen kelisimshart uzartylýy múmkin.
Bul azamattarǵa osy elde 4 jyl 10 aıǵa deıin turýǵa múmkindik beredi. EPS júıesine qatysý úshin Koreıa jaǵy EPS daıyndyq ortalyqtaryna barýdy talap etedi. Bul ortalyqtarda Ońtústik Koreıada jumysqa ornalasqysy keletinder tildi úırený kýrstarynan, kóshi-qoni jáne medıtsınalyq máselelerge qatysty testileýden ótedi.
