Ońtústik Koreıadaǵy zańdy jumys: Qazaqstanmen aradaǵy kelissóz qaı deńgeıde
ASTANA. KAZINFORM – Koreıadaǵy zańdy jumys aıasyndaǵy tıisti kelisimge qashan qol qoıylady, ıaǵnı Employment Permit System (EPS) júıesin iske asyrý qaı merzimge belgilendi? Bul suraqqa Eńbek jáne halyqty áleýmettik qorǵaý mınıstrligi jaýap berdi.
Eske salsaq, biraz jyldan beri Ońtústik Koreıada Qazaqstan azamattary zańsyz júrgeni jaıynda aıtylyp keledi. Eńbek mınıstrliginiń basshylyǵy Qazaqstan azamattarynyń zańdy túrde jumys isteýine qatysty is-sharalar 2024 jyldyń sońyna deıin aıaqtalýy múmkin ekenin aıtqan edi. Odan beri bir jyldan astam ýaqyt ótti.
- Qazaqstan jaǵy Koreıa Respýblıkasynyń memlekettik organdarynyń ókilderimen Qazaqstandy EPS júıesine engizý boıynsha júrgizilip jatqan jumystar aıasynda yntymaqtastyq máseleleri jóninde birqatar kezdesýler ótkizdi. Koreı tarapy óz zańnamasyna sáıkes shetel memleketin EPS júıesine engizý máselesi úsh kezeńde júzege asyrylatynyn atap ótti. Bul turǵyda ishki memlekettik kelisý, EPS ortalyǵyn ashý úshin obektilermen tanysý, sondaı-aq Koreıa Respýblıkasynyń vedomstvoaralyq komıssııasynda memleketti EPS júıesine engizý týraly túpkilikti sheshim qabyldaý eskerilgen. Qazirgi ýaqytta Qazaqstan kelisýdiń birinshi kezeńin aıaqtap, ekinshi kezeńdi júzege asyrý boıynsha jumystar júrgizilip jatyr, - delingen vedomstvonyń Kazinform agenttigine bergen jaýabynda.
Osyǵan deıin taraǵan aqparatqa qaraǵanda, Ońtústik Koreıa Respýblıkasymen kelissózge sáıkes, byltyrǵy jeltoqsannan bıylǵy aqpan aıyna deıin QR azamattaryna elden zańdy túrde shyǵýǵa múmkindik berilgen. https://kaz.inform.kz/news/otandastarimiz-koreyadan-ayippul-tolemey-shiga-aladi-259edf/
- QR Eńbek jáne halyqty áleýmettik qorǵaý mınıstrligi Koreıa Respýblıkasynan erikti túrde ketý baǵdarlamasyna qatysý múmkindigi týraly Qazaqstan azamattaryn aqparattandyrý boıynsha jumys júrgizdi. Aqparat vedomstvonyń resmı ınternet-portalynda ornalastyryldy. Baǵdarlamaǵa qatysý úshin pasport, erikti túrde ketý týraly ótinish jáne áýe bıleti qajet, - dep naqtylady mınıstrlik.
Aıta keteıik, EPS júıesi óz jumysyn 2004 jyldyń 1 tamyzynda bastady jáne qazirge deıin bul júıe boıynsha 20-ǵa jýyq eldiń azamaty Ońtústik Koreıada jumys isteı alady. Bul júıedegi jumys qyzmet kórsetý, óndiris, qurylys, aýyl sharýashylyǵy jáne balyq aýlaý salalarynda usynylady. EPS júıesi sheteldikke Ońtústik Koreıada 3 jylǵa deıin jumys isteýge múmkindik beredi, sondaı-aq jumysshylarmen kelisimshart uzartylýy múmkin. Bul óz kezeginde azamattarǵa osy elde 4 jyl 10 aıǵa deıin turýǵa múmkindik beredi. EPS júıesine qatysý úshin Koreıa jaǵy EPS daıyndyq ortalyqtaryna barýdy talap etedi. Bul ortalyqtarda Ońtústik Koreıada jumysqa ornalasqysy keletinder tildi úırený kýrstarynan, kóshi-qoni jáne medıtsınalyq máselelerge qatysty testileýden ótedi.