Ońtústik Koreıadaǵy zańdy jumys: Qazaqstanmen arada kelisim qashan bekitiledi

ASTANA. KAZINFORM – Eńbek jáne halyqty áleýmettik qorǵaý mınıstri Svetlana Jaqypova Ońtústik Koreıadaǵy Qazaqstan azamattarynyń zańdy jumys isteýine jaǵdaı jasaý múmkindigine túsinik berdi.

Aıta keteıik, qazaqstandyqtar Koreıa Respýblıkasyna jumys isteýge bararda sertıfıkatsııa rásimderinen ótýi kerek. Eńbek mınıstrligi elimizdiń úsh óńirinde tıisti ortalyqtardy daıyndap qoıǵan.

- Úsh ortalyq iske qosýǵa tolyq daıyn. Ońtústik Koreıa jaǵymen kelisimge qol qoıýdy kútip otyrmyz. Byltyr atalǵan elmen tıisti memorandýmdy bekittik, onyń aıasynda qazir osy kelisimdi daıyndap jatyrmyz. Bul qujat jobasy Koreıanyń Eńbek mınıstrligimen kelisilip jatyr, - dedi S. Jaqypova elordada Senat janyndaǵy máslıhattarmen ózara is-qımyl jónindegi keńestiń otyrysy aıasynda tilshiler suraǵyna jaýap bere otyryp.

Onyń aıtýynsha, kelisimge qol qoıylǵannan keıin, ortalyqtar daıyndyq jumystaryn bastaıdy. Ońtústik Koreıa tarapy Qazaqstan jumysshylaryna kásibi pen mamandyǵy boıynsha talaptar qoıady.

- Olar bizge talaptar tizimin berýi kerek, sol tizim boıynsha bul ortalyqtardy iske qosamyz. Olar Shyǵys Qazaqstan men Túrkistan oblystarynda jáne Almaty qalasynda jasaqtaldy. Oqytý aqyly bolady. Syrtqy ister mınıstrligimen birlese jumys júrip jatyr. Atalǵan qujat Qazaqstannyń barlyq memlekettik organdarymen kelisildi, - dedi mınıstr.

Vedomstvo basshysynyń paıymynsha, bıyl birinshi jartyjyldyqta atalǵan qujat bekitilýi múmkin.

Eske salsaq, byltyr kúzde Svetlana Jaqypova Ońtústik Koreıada 15 myń Qazaqstan azamaty zańsyz júrgenin aıtty.