Ońtústik Koreıadaǵy zańdy jumys: Qazaqstan kelissózdi jalǵastyrady

ASTANA. KAZINFORM — Osy kúz aılarynyń sońyna deıin Ońtústik Koreıamen Qazaqstan azamattarynyń jumysqa ornalastyrý protsesin zańdastyrý kelissózi jalǵasady. Bul týraly QR Eńbek jáne halyqty áleýmettik qorǵaý birinshi vıtse-mınıstri Asqarbek Ertaev málim etti.

Onyń sózine qaraǵanda, qazir Ońtústik Koreıada jumys istep júrgen 15 myń qazaqstandyqtyń 11 myńǵa jýyǵy onda zańsyz ornalasqan.

- Eki jyl boıy kelissóz júrgizdik. Biraq, Ońtústik Koreıadaǵy saıası jaǵdaıǵa baılanysty birshama úzilis boldy. Kelisimde azamattarymyzdyń Koreıaǵa zańdy túrde baryp, olardyń eńbek quqyqtary qorǵalýy úshin kúz aılarynyń sońyna deıin kelissózdi jalǵastyramyz, - dedi A. Ertaev Senatta tilshiler suraǵyna jaýap bere otyryp.

Onyń aıtýynsha, Ońtústik Koreıa jaǵy birqatar talap qoıǵan, sonyń ishinde zańsyz júrgen adamdarǵa qatysty shara qoldanýdy suranyp otyr.

- Bul turǵyda kóshi-qon zańnamasyn buzý máseleleri kóterildi. Eger adam zańsyz jumys isteıtin bolsa, Koreıa Respýblıkasynan elimizge oralýy kerek. Keıinnen bekitiletin kelisim aıasynda sol memlekette jumysqa ornalasýy tıis. Zańdy buzýdy jalǵastyra berse, Koreıa bıligi elge kirýge tolyq tyıym salýy múmkin. Sondyqtan olardyń kóshi-qon zańnamasyn oryndaý mańyzdy, - dedi vıtse-mınıstr.

Eske salsaq, buǵan deıin Ońtústik Koreıada zańsyz júrgen Qazaqstan azamattary qaıtarylatyny habarlanǵan edi.