Ońtústik Koreıadaǵy orman órti úshinshi kún qatarynan jalǵasyp jatyr
ASTANA. KAZINFORM — Hamıan okrýginiń ońtústik ýezinde shyqqan orman órti úshinshi kún qatarynan jalǵasyp, órt sóndirýshiler men orman sharýashylyǵy qyzmetkerleri tilsiz jaýdyń negizgi oshaǵyn tolyqtaı aýyzdyqtaýǵa kúsh salyp jatyr. Bul týraly Yonhap agenttigi jazdy.
Koreıanyń Orman qyzmetiniń málimetinshe, órt senbi kúni shamamen 21:00-de tutanyp, sodan beri 190 gektarǵa jýyq aýmaq janyp ketken. Dúısenbi kúni tańǵy 05:00-degi jaǵdaı boıynsha órttiń 32 paıyzy oqshaýlanǵan.
Tún ishinde orman sharýashylyǵy qyzmetkerleri ottyń eldi mekenderge taralýyna jol bermeý úshin 105 órt sóndirý tehnıkasy men 603 adamdy oqıǵa ornyna jiberdi. Alaıda taýly jer bederi men qatty jel órtti sóndirý jumystaryn qıyndatyp otyr.
Vedomstvonyń habarlaýynsha, tań atqannan keıin órt aımaǵyna kezeń-kezeńimen 51 tikushaq jiberiledi.
Buǵan deıin, jeksenbi kúni 22:30-da Orman qyzmeti orman órtterine áreket etýdiń ekinshi deńgeıin engizý týraly buıryq bergen. Mundaı deńgeı órtten keletin zalal 100 gektardan asýy múmkin bolǵanda, jeldiń ortasha jyldamdyǵy sekýndyna 11 metrden joǵary bolǵanda nemese órtti oqshaýlaý 48 saǵattan artyq ýaqyt alýy yqtımal bolǵan jaǵdaıda engiziledi.
Sol kúni 23:14-te Ulttyq órt agenttigi de el boıynsha órt sóndirý kúshterin jumyldyrý týraly buıryq shyǵarǵan. Mundaı shara órttiń aýqymy jergilikti bılik pen kúshterdiń múmkindiginen asyp ketken kezde qoldanylady.
Eske sala keteıik, aqpandaǵy antropogendik klımattyq ózgerister Patagonııa men Chılıde orman órtterin kúsheıtti.