Ońtústik Koreıadaǵy qazaqstandyq mıgranttar elge zańdy túrde orala alady

ASTANA. KAZINFORM – Qazirgi ýaqytta 156,7 myń qazaqstandyq shetelde eńbek etip júr. Olardyń basym bóligi, ıaǵnı 128,8 myń adam Reseıge jumys izdep ketken. 

Al Ońtústik Koreıa Respýblıkasynda 11 myń adam eńbek etedi.

– Ońtústik Koreıa Respýblıkasymen kelissózge sáıkes jeltoqsannan aqpan aıyna deıin QR azamattaryna elden zańdy túrde shyǵýǵa múmkindik berilgen. ıAǵnı azamattar aıyppulsyz, deportatsııasyz elge qaıta alady. Bul 1 jeltoqsanǵa deıin Koreıaǵa kirgen azamattarǵa qatysty. Bul tizimge aýyr qylmys jasaǵan adamdar kirmeıdi. SІM aqparatyna sáıkes, búgingi tańda shamamen Koreıada 11 myńǵa jýyq azamat jumys istep júr, - deıdi «Búgin LIVE» baǵdarlamasyna bergen suhbatynda QR EHÁQM Kóshi-qon komıtetiniń basqarma basshysy Nursultan Asqarbek.

Komıtet basshysynyń aıtýynsha, bul – Ońtústik Koreıa tarapynyń bastamasy.

– Negizgi maqsaty – onda zańsyz júrgen Qazaqstan azamattarynyń sanyn azaıtý. Bul múmkindikti paıdalaný úshin jeke basyn anyqtaıtyn qujaty, ótinishi, áýe bıleti bolsa, elge esh qıyndyqsyz kele alady. Eger azamattar tártipke baǵynbaı, zańsyz júrýin toqtatpasa, Qazaqstan valıýtasymen eseptegende 50 myńnan bastap aıyppul tóleıdi. Ol ártúrli jaǵdaıǵa baılanysty ózgere beredi. Eger Ońtústik Koreıadaǵy zańsyz júrgen qazaqstandyq azamattardyń sany azaısa, elimiz EPS júıesine kiredi jáne álemdik arenadaǵy el ımıdji joǵarylaıdy, - deıdi spıker.

Eske sala keteıik, birneshe kún buryn UQK Shekara qyzmeti Aqtóbe oblysynyń «Jaısań» avtokólik ótkizý pýnktinde zańsyz kóshi-qon áreketin toqtatty.