Ońtústik Koreıada júkti áıelderge arnalǵan vaýcherlerge ótinish 8%-ǵa artty

ASTANA. KAZINFORM — Júkti áıelderge beriletin vaýcherlerge ótinishter sany bıylǵy jyldyń alǵashqy toǵyz aıynda ótken jylmen salystyrǵanda 8,1 paıyzǵa artty. Bul — álemdegi týý kórsetkishi tómen elde demografııanyń qaıta ósýine zor múmkindik, dep jazdy Yonhap agenttigi.  

Ulttyq densaýlyq saqtandyrý qyzmetiniń derekterine sáıkes, qańtar-qyrkúıek aılarynda mundaı vaýcherlerge berilgen ótinishter sany 257 761 bolǵan. Ótken jyldyń osy kezeńinde bul kórsetkish 238 507 edi.

Bul kórsetkish túsik tastaý jaǵdaılaryna baılanysty bala týý sanyna dál sáıkes kelmegenimen, ol týý kórsetkishterindegi ózgeristerdi kórsetetin ındıkator retinde qarastyrylady.

Aılyq kórsetkish boıynsha, qańtarda ótinishter sany jyldyq esepte azaıǵanymen, kelesi segiz aıda ósim kórsetken. Maýsym-qyrkúıek aralyǵynda eki tańbaly ósim tirkelip, bul úrdis kelesi jyldyń basyna deıin jalǵasýy múmkin degen boljam kúsheıdi.

Úkimettiń málimetine sensek, Ońtústik Koreıada 2024 jyly sońǵy toǵyz jylda alǵash ret bala týý sany artqan. Buǵan pandemııadan keıingi neke sanynyń kóbeıýi, ata-ana bolýǵa degen kózqarastyń ózgerýi jáne demografııalyq faktorlar áser etken.

Eske sala keteıik, buǵan deıin Ońtústik Koreıa prezıdenti týý kórsetkishin arttyrýdyń tıimdi tásilin usynǵan bolatyn.