Ońtústik Koreıada jeke derekterdiń tarap ketýinen 33,7 mln paıdalanýshy zardap shekti

ASTANA. KAZINFORM — Ońtústik Koreıanyń Coupang elektrondy kommertsııa kompanııasy jeke derekterdiń aýqymdy tarap ketýinen 33,7 mıllıon paıdalanýshy zardap shekkenin rastady. Aldyn ala málimet boıynsha, kúdikti kompanııanyń burynǵy qyzmetkeri.

Ońtústikkoreıalyq Yonhap agenttiginiń habarlaýynsha, aqaý saldarynan klıentterdiń negizgi derekteri jarııa bolyp ketken. Olarǵa esimderi, telefon nómirleri, elektron poshta mekenjaılary jáne jetkizý mekenjaılary kiredi.

Kompanııanyń málimdeýinshe, tólem derekteri, bank kartalaryna qatysty aqparat jáne eseptik jazba málimetteri zardap shekpegen.

Resmı málimdemede Coupang jetkizýge qatysty tutynýshylardyń jeke aqparatyna ruqsatsyz kirý 24 maýsymnan bastap sheteldik serverler arqyly júzege asyrylǵany aıtylǵan.

Kompanııanyń ózi urlyqty 18 qarashada anyqtap, eki kún ishinde bılik organdaryna jáne shamamen 4500 tutynýshyǵa habarlady.

Oqıǵaǵa qatysty tergeý 20 qarashada bastaldy. Osy ýaqytqa deıin tarap ketken derekter aýqymy aıtarlyqtaı úlken ekeni jáne shabýyl birneshe aıǵa sozylýy múmkin ekeni aıtyldy.

Qazirgi ýaqytta jumys toby kompanııanyń jeke derekterdi qorǵaý talaptaryna sáıkestigin keshendi tekserýden ótkizip, odan ári zalaldyń aldyn alý sharalaryn qabyldap jatyr.

Ońtústik Koreıa úkimetiniń málimetinshe, shabýyldaýshy Coupang serverin tekserý júıesindegi osaldyqty paıdalanyp, 30 mıllıonnan astam paıdalanýshynyń derekterine qol jetkizgen.

Agenttik derekkózderiniń málimetinshe, quqyq qorǵaý organdary kúdiktini kompanııanyń burynǵy qyzmetkeri, keıinnen elden ketken Qytaı azamaty ekenin anyqtady.

Jeksenbide Coupang kópshilik aldynda keshirim surady. Bas dırektor Pak De Djýn kompanııanyń tsıfrlyq qaýipsizdik sharalaryn kúsheıtetinin jáne memlekettik organdarmen tolyq yntymaqtasatynyn málimdedi.

Coupang oqıǵasy Ońtústik Koreıa tarıhyndaǵy eń iri jeke derekterdiń tarap ketýi dep ataldy. Buǵan deıin bul rekord sáýir aıynda SK Telecom kompanııasy derekteriniń urlanýyna qatysty bolǵan, ol kezde 23,2 mıllıon paıdalanýshyǵa áser etken jáne 134,8 mıllıard von aıyppul salynǵan.

Buǵan deıin QR Bas prokýratýrasy Gmail paıdalanýshylary derekteriniń taralýyna baılanysty kıberqaýip anyqtalǵannan keıin paıdalanýshylarǵa Google elektrondy poshtasynyń qupııa sózderin ózgertýdi usynǵany habarlanǵan bolatyn. Qylmysty jáne qoǵamdyq qaýipsizdik táýekelderin boljaý ortalyǵy Google derekqorynyń buzylǵanyn habarlady.