Ońtústik Koreıada zaýytta bolǵan órt saldarynan 22 adam qaza tapty

ASTANA. KAZINFORM-Dúısenbi kúni Ońtústik Koreıanyń Hvason qalasyndaǵy lıtıı akkýmýlıatoryn óndiretin zaýyttan shyqqan órtten kem degende 22 adam, sonyń ishinde sheteldikter qaza tapty, dep jazady Yonhap.

Bir adam iz-túzsiz joǵalyp ketkendikten, qaza tapqandar sany áli de artýy múmkin, deıdi bılik ókilderi.

Qaza tapqandardyń 20-sy sheteldikter: 18-i Qytaı azamaty, bir Laos azamaty jáne azamattyǵy anyqtalmaǵan bir adam bar.

Seýlden ońtústikke qaraı 45 shaqyrym jerde ornalasqan Hvasondaǵy lıtıı akkýmýlıatorlaryn shyǵaratyn Aricell zaýytynda órt tańǵy saǵat 10:30 shamasynda bastalǵan. Negizgi órt oshaǵy 15:10-da baqylaýǵa alyndy.

Órt sóndirýshiler órt bastalǵannan keıin tórt saǵattan astam ýaqyt ótken soń ǵımaratqa kirip, máıitterdi tapty.

Órt belgisiz sebeptermen úsh qabatty ǵımarattan shyqqan.

Órt sóndirýshiler lıtıı akkýmýlıatorlary órtin dástúrli ádispen sóndirý qıyn bolǵandyqtan, órtti tolyǵymen sóndirý qıynǵa soǵatynyn habarlady.

Órt sóndirý bóliminiń málimetinshe, akkýmýlıatorlardyń úzdiksiz jarylýy saldarynan jalyn tez taralyp, qutqarýshylardyń izdeý-qutqarý jumystaryn júrgizý úshin ǵımaratqa kirýi qıyndaǵan. Aldyn ala málimet boıynsha, ǵımaratta kem degende 35 myń akkýmýlıator bolǵan.