Ońtústik Koreıada zańsyz júrgen Qazaqstan azamattary qaıtarylady - mınıstrlik
ASTANA. KAZINFORM – Ońtústik Koreıada 15 myń Qazaqstan azamaty zańsyz júr. Bul týraly Eńbek jáne halyqty áleýmettik qorǵaý mınıstri Svetlana Jaqypova málim etti.
Búgin Májilistegi Úkimet saǵatynan keıin tilshiler mınıstrge Ońtústik Koreıadaǵy Qazaqstan azamattarynyń zańdy jumys isteýine jaǵdaı jasaý múmkindigi týraly suraq qoıdy.
«Elimizdiń memlekettik organdary biz daıarlaǵan qujat jobasyna kelisimin berdi. Ol kelisimshart QR Syrtqy ister mınıstrligi arqyly Koreıaǵa joldandy. Qazir ony sol eldiń memlekettik organdary qarastyryp jatyr. Budan bólek, Koreıa Respýblıkasynyń Prezıdenti Qazaqstanǵa saparmen kelgen kezde, eki eldiń mınıstrlikteri tıisti memorandýmǵa qol qoıdy. Osy oraıda tıisti qujattardy almasý iske asyrylyp jatyr», - dedi S.Jaqypova.
Onyń aıtýynsha, Eńbek jáne halyqty áleýmettik qorǵaý vıtse-mınıstri Asqarbek Ertaev Ońtústik Koreıaǵa barǵan.
«Olar bizdiń memleketke úsh talap qoıyp otyr. Birinshiden, Koreıadaǵy elshilikte atalǵan jumystarmen aınalysatyn attashe laýazymyn engizý kerek ekenin aıtty. 15 myńǵa jýyq Qazaqstan azamaty sol elde zańsyz júr. Olar «15 myń adamdy Qazaqstanǵa shaqyrtyńdar» degen talabyn jarııalady. Kelesi talaby halyqaralyq sertıfıkatqa qatysty. Bul turǵyda qazaqstandyqtar Koreıa Respýblıkasyna jumys isteýge bararda sertıfıkatsııa rásimderinen ótýi kerek. Biz úsh óńirde jańa ortalyqtardy daıyndap qoıdyq. Almatyǵa ol kisiler ózderi kelip, qarap ketti. Aıta ketý kerek, biz barlyq talapty oryndadyq. Endi qazir barlyq rásimderdi kútip otyrmyz», - dedi mınıstr.
Onyń sózine qaraǵanda, Qazaqstan azamattaryn qaıtarý kezinde eshqandaı ákimshilik ári quqyqtyq mindettemeler qoıylmaıdy. Eger olar qazir kelip, áýejaıdan bılet satyp alyp kelse, jaýapkershilik bolmaıdy.
Sonymen qatar vedomstvo basshysy Qazaqstan azamattarynyń zańdy túrde jumys isteýine qatysty is-sharalar jyl sońyna deıin aıaqtalýy múmkin ekenin aıtty.
Eske sala keteıik, bıyl jazda Qazaqstan men Koreıa 11 mańyzdy qujatqa qol qoıdy.
