Ońtústik Koreıada ushaq apatynan keıin 68 myń jolaýshy áýe bıletin keri qaıtarǵan

ASTANA. KAZINFORM — Ońtústik Koreıadaǵy ushaq apatynan keıin turǵyndar áýe saparlarynan bas tartyp jatyr. Bul týraly 24.kz saıty jazdy.

Eki kúnde 68 myń bılet keri qaıtarylǵan. Kóbi apatqa ushyraǵan «Chedjý Eır» kompanııasyna tıesili. Sondyqtan týrıstik agenttikter dál osy tasymaldaýshynyń reısterinen bas tartqan jolaýshylardan aıyppul almaı jatyr.

Olar klıentterine ózge iri áýe kompanııalaryn usynyp, bıletterin aýystyryp berip jatyr. 29 jeltoqsanda Ońtústik Koreıanyń Mýan qalasynyń halyqaralyq áýejaıynda Boıng 737-800 laıneri ushý-qoný jolaǵynan shyǵyp ketip, beton qorshaýǵa soǵylǵan. Artynsha jarylys bolyp, sońy órtke ulasqan. Saldarynan bortyndaǵy 181 adamnyń tek ekeýi ǵana tiri qaldy.

Apatqa áýe kemesiniń dóńgelegindegi aqaý sebep bolýy múmkin. Al keshe dál osy kompanııanyń dál osy modeldegi basqa ushaǵynda dóńgelegine qatysty problema týyndap, laıner áýejaıǵa oralǵan. Bul oqıǵalardan keıin bılik Boıng 737-800 úlgisindegi barlyq ushaqty tekserý tapsyrmasyn berdi. Jergilikti áýe tasymaldaýshylardyń kóbi osy ushaqtardy jıi qoldanady.

Eske sala keteıik, joıqyn ushaq apatynan keıin Ońtústik Koreıada Boeing 737-800 ushaqtary túgel tekserilgeli jatqanyn jazǵan edik.