Ońtústik Koreıada Tramp pen Sı Tszınpınniń kezdesýi ótip jatyr
ASTANA. KAZINFORM – Ońtústik Koreıanyń Pýsan qalasynda QHR tóraǵasy Sı Tszınpın men AQSh prezıdenti Donald Tramptyń kezdesýi ótip jatyr. Atalǵan kezdesý álemdik eki derjavanyń qarym-qatynasyn ońtaılandyra túsýi kerek, dep habarlaıdy Kazinform agenttiginiń menshikti tilshisi.
Ekijaqty kezdesý jergilikti ýaqyt boıynsha saǵat 11:00-de (Astana ýaqyta boıynsha tańǵy 07:00-de) Ońtústik Koreıanyń Kımhe avıabazasynda bastaldy. Sı Tszınpın munda Tramptyń aldynda Azııa –Tynyq Muhıty ekonomıkalyq yntymaqtastyǵy sammıtine qatysý úshin keldi.
Tramp pen Sı Tszınpın zalǵa qarma-qarsy eki esikten kirip, AQSh pen Qytaı týlarynyń janynda turyp, bir-birimen qol alysty. Eki kóshbasshy da BAQ úshin shaǵyn málimdeme jasady.
Tramp óziniń qysqa úndeýinde onyń Sı Tszınpınmen qarym-qatynasy jaqsy ekenin atap ótti, dep habarlaıdy CBS News.
- Men búgingi kezdesýimizdiń sátti bolatynyna kúmán týǵyzbaımyn. Alaıda ol óte qatań kelissóz júrgizýshi. Bul árıne, jaqsy emes,-dedi Donald Tramp.
Qytaı kóshbasshysymen kezdesýdiń aldynda Tramp «men úshin dosymmen kezdesý úlken mártebe» degen bolatyn, dep habarlaıdy NBC News.
- Biz keıbir máseleni taqyladyq. Menińshe, biz olardyń kóbi boıynsha kelisimge keldik, qazir taǵy bir sharýany kelisip jatyrmyz, - dedi Donald Tramp.
- Tóraǵa Sı uly eldiń uly kóshbasshysy. Bizdiń aramyzda uzaq jyldar boıy keremet qarym-qatynas bolady jáne biz úshin aramyzda sizderdi kórý úlken mártebe, - dep jalǵastyrdy AQSh prezıdenti.
Sı Tszınpın bolsa «men de sizben júzdeskenime qýanyshtymyn», dedi. Qytaı kóshbasshysynyń sózin NBC News keltirdi.
Qytaı kóshbashysy jyl basynan beri óziniń Tramppen úsh ret telefon arqyly sóıleskenin, birneshe ret hat almasyp, «tyǵyz qarym-qatynasta» bolǵanyn jetkizdi.
Olardyń jetekshiligimen «Qytaı-AQSh qarym-qatynastary jalpy alǵanda turaqty bolyp keldi».
Sı Tszınpın ótken aptada AQSh pen Qytaıdyń saýda delegatsııalarynyń arasynda Malaızııada ol jetkizilgen konsensýs búgingi kezdesýge qajetti sharttar qalyptastyrǵanyn atap ótti.
- Biz ulttyq sharttarymyz ártúrli, soǵan qaraı kózqarasymyzdyń da toǵyspaı jatqan tustary bolady. Sol sebepti álemniń jetekshi ekonomıkalarynyń arasynda ara-tura pikir qaıshylyǵynyń týyndaýy zańdy nárse, - dedi Sı Tszınpın.
Qytaı basshysy Tramp ekeýiniń «durys baǵytty tańdaýy kerek» ekenin jetkizdi.
-Men Qytaıdyń damýy Sizdiń AQSh-ty qaıtadan uly elge aınaldyrý baǵytyndaǵy kózqarasyńyzben sáıkes keletine senemin, - dedi QHR tóraǵasy.
Sı Tszınpın Trampqa: «Siz búkil álemde beıbitshiliktiń ornyǵýyna kúsh salyp, óńirlerdegi ótkir máselelerdiń sheshilýine uıtqy bolyp otyrsyz»,-dedi.
-Búgin álem kóptegen problemalarmen betpe-bet kelip otyr. Osy rette Qytaı men AQSh álemniń jetekshi derjavalary retinde eki el men búkil álemniń ıgiligi jolynda jaýapkershilikti moınyna alyp, búgingiden de joǵary jetistikterge jetý úshin birlese áreket ete alady,-dep málimdedi Sı Tszınpın.
Tramp pen Sı Tszınpıdiń kezdesýiniń ózge bóligi BAQ úshin jabyq bolady.
Aqy úıdiń resmı kún tártibinde Sı Tszınpınmen kezdesýge eki saǵattan az ýaqyt bólingen. Degenmen Tramp kezdesýdiń eki-úsh saǵatqa sozylatynyn aıtqan bolatyn.