Ońtústik Koreıada órt: tótenshe áreket etý rejımi engizildi
ASTANA. KAZINFORM – Ońtústik Koreıanyń Ulttyq órtke qarsy qyzmeti (NFA) qalada taralyp jatqan órtti sóndirý úshin qoljetimdi personal men tehnıkany jumyldyrý maqsatynda tótenshe áreket etý rejımin engizý týraly buıryq shyǵardy dep habarlaıdy Yonhap.
Órt bastalǵannan shamamen eki saǵat ótken soń — jergilikti ýaqyt boıynsha saǵat 14:00 shamasynda — Ońtústik Koreıanyń Tegý qalasynda ornalasqan Hamdjı taýynda órt bastalyp, ol jaqyn mańdaǵy aýyldarǵa qaraı tarala bastaǵanda tótenshe áreket etý rejımin engizý týraly buıryq berildi. Bul qala Seýlden ońtústik-shyǵysqa qaraı shamamen 230 shaqyrym jerde ornalasqan.
Osy buıryq aıasynda órtti sóndirý jumystaryna qosymsha 28 órt sóndirý mashınasy tartyldy. Buǵan deıin 67 órt sóndirý kóligi men 29 órt sóndirý tikushaǵy jumyldyrylǵan.
Qazirgi ýaqytta adam shyǵyny týraly aqparat joq. Alaıda jaqyn mańdaǵy aýdandardyń turǵyndaryna jergilikti bastaýysh mektepterge evakýatsııalaný týraly buıryq berildi.
Prezıdent mindetin atqarýshy Han Dok Sý barlyq tıisti vedomstvoǵa «barlyq qoljetimdi tehnıkany jáne personaldy» órtti sóndirý jáne turǵyndardy qaýipsiz jerlerge evakýatsııalaý úshin paıdalanýdy tapsyrdy.
— Órt qatty jeldiń áserinen jyldam taralyp jatqandyqtan jáne jaqyn mańda turǵyn úıler ornalasqandyqtan, adam ólimine jol bermeý úshin shuǵyl qutqarý jáne evakýatsııa boıynsha barlyq qajetti sharany qabyldaý kerek, — dep atap ótti ol.
Ońtústik Koreıanyń Orman qyzmeti orman órtine qarsy eń joǵary — úshinshi deńgeıdegi áreket etý rejımin jarııalady, óıtkeni kúshti jel órttiń taralýyna yqpal etip otyr.
Úshinshi deńgeıli rejım jeldiń jyldamdyǵy sekýndyna 7 metrden asqanda, boljamdy zaqymdaný aýmaǵy 100 gektardan kóp bolǵanda jáne órtti sóndirý jumystary 24 saǵattan astam ýaqyt alýy múmkin degen jaǵdaıda engiziledi.
Jergilikti ýaqyt boıynsha saǵat 18:00–degi málimetke sáıkes, órt shamamen 57 gektar jerdi sharpyǵan, al órtti oqshaýlaý deńgeıi 14,5%-dy quraǵan, dep habarlady órt sóndirý qyzmeti.
Aıta keteıik, buǵan deıin Ońtústik Koreıanyń ońtústik-shyǵys óńirin sharpyǵan orman órti saldarynan 18 adam qaza tapqanyn jazǵan edik. Sondaı-aq, órt sóndirý tikushaǵynyń apatqa ushyraýy saldarynan ushqysh kóz jumǵan.