Ońtústik Koreıada oqýshy sanynyń azaıýyna baılanysty 49 mektep jabylýy múmkin

ASTANA. KAZINFORM — Ońtústik Koreıada tómen týý deńgeıine baılanysty bastaýysh synyp oqýshylarynyń sany azaıyp, 2025 oqý jylynda 49 mekteptiń jabylýy josparlanyp otyr, dep habarlady Yonhap agenttigi. 

Ońtústik Koreıa Ulttyq Jınalysynyń Bilim berý komıtetiniń depýtaty Kım De Shıktiń 28 aqpanda jarııalaǵan Bilim mınıstrliginiń derekterine sáıkes, 2025 oqý jylynda bastaýysh synyptyń birinshi synybyna qabyldanatyn oqýshylar sany 356 258 bolady. Bul — 10 jyl burynǵy kórsetkishten 21,8%-ǵa tómen. 

Sarapshylardyń pikirinshe, týý kórsetkishiniń tómendeýine baılanysty aldaǵy jyldary kóptegen mektepti biriktirý nemese jabý protsesi jalǵasýy múmkin. Statıstıka agenttiginiń málimetteri boıynsha, Ońtústik Koreıada týý kórsetkishi 2004 jylǵy 476 958 baladan 2024 jyly 238 300 balaǵa deıin eki ese azaıdy. 

Óńirler boıynsha týý kórsetkishiniń eń kóp tómendeýi Chollabýk-do (-60,6%), Kvandjý (-59,3%) jáne Seýl (-58,3%) qalalarynda baıqaldy. 

Osy demografııalyq ózgeristerge baılanysty 2025 jyly eldegi 49 mekteptiń jabylýy josparlanyp otyr. 2020 jyldan byltyrǵa deıin elde 137 mektep jabyldy.

Eske sala keteıik, Japonııada týý kórsetkishi byltyr rekordtyq deńgeıge deıin tómendegenin habarlaǵan edik.