Ońtústik Koreıada muragerlik salyq saldarynan mıllıonerler sany azaıyp barady

ASTANA. KAZINFORM — Ońtústik Koreıa muragerlik salyqtyń qatań júıesine baılanysty aýqatty azamattardyń jappaı elden ketýin bastan ótkerip jatqan elderdiń qataryna kirdi, dep habarlaıdy AZERTADJ.

Brıtandyq Henley & Partners konsaltıngtik kompanııasy seısenbi kúni jarııalaǵan sońǵy taldaý ótken jyly Ońtústik Koreıadan 2400 mıllıonerdiń ketkenin kórsetti. Bul kórsetkish 2024 jyly tirkelgen 1200 adammen salystyrǵanda eki ese kóp. Osylaısha, Ońtústik Koreıa mıllıonerlerdiń ketýi boıynsha Ulybrıtanııa, Qytaı jáne Úndistannan keıin álemde tórtinshi orynǵa shyqty, dep jazady South China Morning Post.

— Kapıtal kóshi-qonynyń jedeldeýiniń negizgi sebebi Koreıadaǵy muragerlik salyqtyń joǵary mólsherlemesi bolýy múmkin. Ol 60 paıyzǵa deıin jetedi, — dedi Koreıanyń Saýda-ónerkásip palatasynyń (KCCI) ókili.

Ulttyq jınalys álemdegi eń joǵary muragerlik salyq mólsherlemesin tómendetý týraly zań jobasyn talqylaýdy ýaqytsha toqtatqandyqtan, bıznes-qaýymdastyq 2072 jylǵa qaraı Koreıanyń muragerlik salyqtan túsetin kirisi 35,8 trln vonǵa (shamamen 25 mlrd AQSh dollary) jetýi múmkin dep boljaıdy. Al 2024 jyly bul kórsetkish 9,6 trln vondy quraǵan.

Bul boljam salyq salynatyn tulǵalar sanynyń turaqty ósýimen baılanysty. Oǵan zańnamaǵa ózgerister engizýdiń birneshe ret keıinge qaldyrylýy jáne adamdardyń ómir súrý jasynyń uzarýy áser etip otyr.

KCCI úkimetti iri kompanııalardy muraǵa alatyn tulǵalarǵa muragerlik salyqty 20 jylǵa bólip tóleýge ruqsat berýge shaqyrdy. Qazirgi tańda mundaı múmkindik tek shaǵyn jáne orta bıznes muragerlerine ǵana qarastyrylǵan. Al jeke tulǵalardan nemese iri konglomerat ıelerinen aktıv muraǵa alatyndar salyqty 10 jyl ishinde tolyq tóleýge mindetti.

Buǵan deıin habarlanǵandaı, Ońtústik Koreıanyń burynǵy birinshi hanymy sybaılas jemqorlyqqa qatysty sot úkimine shaǵymdandy.