Ońtústik Koreıada muǵalimder men ata-analardyń sóılesken sáti qurylǵyǵa jazylady
Seýldiń barlyq bastaýysh mektebinde ata-analarmen sóılesken sátti jazyp otyratyn qurylǵylar ornatylady, dep habarlaıdy QazAqparat Yonhap agenttigine silteme jasap.
Budan bólek, bastaýysh jáne orta mektepterde muǵalimderdiń atynan ata-analardyń shaǵymyn qaraıtyn chat-bot engiziledi, dep habarlady Seýl bilim bóliminiń basshysy seısenbide.
Bul – Ońtústik Koreıa mektepterinde muǵalimderdiń óz-ózine qol jumsaýynan keıin basqa mektepterdegi ata-analar tarapynan jasalatyn býllıngke jol bermeý úshin jasalǵan sharalardyń biri. Josparǵa sáıkes, jeltoqsan aıynda ata-analardyń shaǵymyn táýlik boıy qarastyratyn pılottyq chat-bot qyzmeti iske qosylady. Al naýryz aıynda el astanasynyń barlyq bastaýysh jáne orta mektebine engizilmek.
Jeke nazar aýdarýdy qajet etetin ata-analardyń shaǵymy bilim berý basqarmasynyń baılanys ortalyǵyna nemese jeke chat qyzmetine jiberiledi.
2024 jyldyń sońyna qaraı Seýldegi barlyq bastaýysh mektepte telefon jazý qurylǵylary ornatylady jáne ata-analar kelesi qyrkúıek aıynan bastap muǵalimdermen kezdesý úshin mobıldi qosymsha arqyly aldyn ala ruqsat alýy qajet. Sonymen qatar ata-analar tarapynan kez kelgen sózben balaǵattaý nemese zorlyq-zombylyq kórsetý jaǵdaıyn boldyrmaý úshin mektepterdiń májilis zaldarynda beınebaqylaý júıesi de ornatylady.
Osy sharalarǵa sáıkes Seýl bilim basqarmasy zańgerlik qoldaý júıesin engizýdi josparlap otyr, onyń aıasynda ár mektepke advokat taǵaıyndalady. Ol oqýshylarǵa qatygezdik jasady dep aıyptalǵan muǵalimderge zańgerlik keńes beredi.
Qyrkúıek aıynyń basynda búkil Ońtústik Koreıada jappaı mıtıngiler ótti. 120 myńǵa jýyq mektep muǵalimi ata-analardyń qorqytýynan keıin óz-ózine qol jumsaǵan áriptesterin joqtaý úshin kóshege shyqqan.
Sherýshilerdiń maqsaty – bılik ókilderin aldaǵy ýaqytta osyndaı qaıǵyly oqıǵalardyń aldyn alý úshin shara qoldanýǵa shaqyrý.
