Ońtústik Koreıada metro qyzmetkerleri qatarynan ekinshi kún ereýilge shyqty

Seýldegi qalalyq metro júıesiniń operatory Seoul Metro kompanııanyń shtatty qysqartý josparyna narazylyq retinde beısenbi kúni eki kúndik eskertý ereýilin bastady. Kazinform bul týraly Korea Herald basylymyna silteme jasap habarlaıdy. 

Seoul Metro kásipodaǵy narazylyq sharasyn beısenbi kúni tańǵy saǵat 9-dan bastady. Ereýil juma kúni keshki saǵat 18.00-ge deıin jalǵasyn tapty.

Seoul Metro tapshylyq máselesin sheshý úshin 2026 jylǵa qaraı jalpy jumys kúshin 2 212 qyzmetkerge nemese 13,5%-ǵa qysqartý josparyn ázirlegen bolatyn. Buǵan kásipodaq narazylyq bildirdi, biraq basshylyq qyzmetkerler sanyn qysqartýdy talap etip, 383 adamnyń jumystan bıyl bosatylýy tıis ekenin, qalǵandaryn qysqartý keıinirek talqylanatynyn aıtqan. 

Kásipodaq qaýipsizdik maqsatynda qyzmetkerleriniń sany jetkilikti bolýy úshin eń bolmaǵanda zeınetke shyǵyp otyrǵan 276 qyzmetkerdiń ornyna qajetti jumys kúshin alýdy usyndy. Alaıda basshylyq budan bas tartyp, kelissózder toqtady. 

Osy arada eldiń Eńbek mınıstri Lı Chjon Sık beısenbide áleýmettik jelilerde Seoul Metro-nyń jıyntyq tapshylyǵy byltyr 17,68 trln vonǵa (13,48 mlrd AQSh dollary) jetkenin túsindirip, ereýildi toqtatýǵa shaqyrdy. 

Lı jumysshylardyń qajetti qoǵamdyq qyzmettiń kórsetilýine jaýapty ekenin aıtyp, olardyń jumysqa oralýyn surady. 

Bul — odaqtyń ekinshi jyl qatarynan ótkizip jatqan narazylyq sharasy. Alaıda bıylǵy eki kúndik ereýil byltyrǵy tolyqkólemdi sharanyń bastaýy jáne eskertýi ǵana bolýy ábden múmkin. 

Aıta keteıik, Seýl metrosynda barlyǵy 9 jeli bar.