Ońtústik Koreıada qus tumaýynyń órshýi: bılik qaýipsizdik sharalaryn kúsheıtti
ASTANA. KAZINFORM — Ońtústik Koreıa astanasy Seýldiń shetindegi qus fabrıkasynda joǵary patogendi qus tumaýynyń jańa jaǵdaıy rastaldy, dep habarlaıdy Yonhup.
Bıylǵy maýsymda aýrýǵa shaldyqqan qustyń sany 53-ke jetti.
Tótenshe jaǵdaılardy basqarý jáne qaýipsizdik jónindegi ortalyq shtabtyń málimetinshe, indet el astanasynan soltústikke qaraı 40 shaqyrym jerde ornalasqan Kengıdo provıntsııasynyń Pochhon qalasyndaǵy qus fabrıkasynda anyqtalǵan.
Bılik fermaǵa kirýdi shektep, aýrý qustardy joıýǵa jáne indettiń sebebin anyqtaýǵa kiristi. Jaqyn mańdaǵy nysandarda 24 saǵattyq jumys toqtatyldy.
Úkimet sonymen qatar qystyń aıaǵynda ınfektsııanyń odan ári taralýyn boldyrmaý úshin 20 naýryzǵa deıin el boıynsha 200-den astam qus fabrıkasyn arnaıy tekserýdi tapsyrdy.
Aıta keteıik, osyǵan deıin Germanııada qus tumaýynyń kesirinen 500 myń qus joıyldy.
Sondaı-aq Leıptsıg haıýanattar baǵy qus tumaýyna baılanysty birqazandaryn joıdy.
