Ońtústik Koreıada quny 276 mln dollar bolatyn sýperkompıýter iske qosyldy
ASTANA. KAZINFORM — Ońtústik Koreıada jasandy ıntellektini damytý jáne ǵylymı zertteýler júrgizý maqsatynda jańa ulttyq Hangang sýperkompıýteri tanystyryldy, dep habarlaıdy The Korea Times.
Tusaýkeser 2 qarashada Tedjon qalasyndaǵy Koreı ǵylymı-tehnıkalyq aqparat ınstıtýtynda ótti. Іs-sharaǵa ǵylymı qaýymdastyqtyń, memlekettik zertteý ortalyqtary men tehnologııalyq kompanııalardyń 200-ge jýyq ókili qatysty.
Altynshy býyndaǵy esepteý júıesin ázirleýge 382,5 mlrd von (shamamen 276 mln dollar) bólingen. Jańa sýperkompıýter 2018 jyly paıdalanýǵa berilgen Nurion júıesiniń ornyn basady.
Nurion 8 jyl boıy jumys istep, 1 730 ǵylymı jobany júzege asyrýǵa paıdalanylǵan. Onyń kómegimen júrgizilgen zertteýler nátıjesinde ǵalymdar 1 520 ǵylymı eńbek jarııalady. Olardyń 70-i jetekshi halyqaralyq ǵylymı jýrnaldarda jaryq kórgen.
Hangang júıesiniń burynǵy sýperkompıýterden basty aıyrmashylyǵy — derekterdi óńdeý jáne jasandy ıntellekt tapsyrmalaryn oryndaý múmkindiginiń keńeıýi.
Jańa sýperkompıýter 8 496 grafıkalyq jáne 9 936 ortalyq protsessormen jabdyqtalǵan. Sondaı-aq onyń quramynda Nvidia GH200 Grace Hopper joǵary ónimdi chıpteri bar.
Tehnıkalyq sıpattamalary boıynsha jańa júıe aldyńǵy nusqasynan edáýir qýatty. Onyń teorııalyq esepteý qýaty 24 ese, derekterdi saqtaý syıymdylyǵy 10 ese, al aqparat almasý jelisiniń ónimdiligi tórt ese artqan.
Hangang sýperkompıýteriniń eń joǵary esepteý qýaty sekýndyna 614,7 petaflopsqa, ıaǵnı 614,7 kvadrıllıon operatsııaǵa teń. Ońtústik Koreıanyń Ǵylym jáne aqparattyq-kommýnıkatsııalyq tehnologııalar mınıstrligi jańa júıe álemdegi TOP500 sýperkompıýterler reıtınginiń alǵashqy ondyǵyna kiredi nemese soǵan jaqyn oryn alady dep boljap otyr.
Júıeni jasandy ıntellekt modelderin oqytýmen qatar, aýa raıyn boljaý, jol-kólik oqıǵalaryn modeldeý jáne úlken esepteý resýrstaryn qajet etetin basqa da ǵylymı zertteýlerde paıdalaný josparlanǵan.
Sondaı-aq sýperkompıýter jasandy ıntellektiniń ozyq tehnologııalaryn ǵylymı jáne tehnologııalyq mindetterdi sheshýge baǵyttalǵan K-Moonshot memlekettik baǵdarlamasyna qatysady.
Hangang júıesin synaqtan ótkizý qazan aıynyń sońynda bastalǵan. Al onyń esepteý qýatyn tolyq paıdalanýǵa 16 jeltoqsanda qoljetimdilik beriledi dep josparlanǵan.
KISTI prezıdenti Lı Sık ınstıtýt sýperkompıýterlerdi paıdalaný barysynda jınaqtalǵan tájirıbeni jańa júıeniń úzdiksiz jumysyn qamtamasyz etýge jáne zertteýshilerdi qoldaýǵa jumsaıtynyn atap ótti.
Aıta keteıik, Qazaqstanda taǵy bir qýatty sýperkompıýter iske qosylady.
