Ońtústik Koreıada qorǵanys kontserni men vıdeooıyn ázirleýshisi ortaq JI iske qospaq
ASTANA. KAZINFORM – Ońtústik Koreıanyń qorǵanys kontserni Hanwha Aerospace jáne vıdeoıgra shyǵarýshy Krafton kompanııasy fızıkalyq jasandy ıntellekt tehnologııalaryn birlesip ázirleý jáne ortaq kásiporyn qurý týraly kelisimge keldi. Bul týraly Yonhap News agenttigi habarlady.
Taraptar qol qoıǵan ózara túsinistik týraly memorandým fızıkalyq jasandy ıntellekt salasyndaǵy negizgi sheshimderdi birlesip zertteý men ázirleýdi, sondaı-aq olardy qoldanýdyń yqtımal stsenarıılerin synaqtan ótkizýdi jáne qajetti tehnıkalyq ári operatsııalyq ınfraqurylymdy qurýdy qarastyrady.
Kompanııalar ázirlemelerdi kommertsııalandyrýdy birlesken kásiporyn arqyly júzege asyrýdy josparlap otyr. Sonymen qatar seriktester uzaq merzimdi yntymaqtastyq modelin qalyptastyrýdy kózdeıdi.
Seriktestik aıasynda Hanwha Aerospace kompanııasynyń qorǵanys jáne óndiristik múmkindikteri, onyń ishinde ushqyshsyz júıeler tehnologııalary, Krafton kompanııasynyń jasandy ıntellekt pen baǵdarlamalyq qamtamasyz etý ázirleý salasyndaǵy tájirıbesimen biriktiriledi.
Aldaǵy ýaqytta kompanııalar yntymaqtastyqty avıatsııa jáne ǵarysh salalaryna da keńeıtýdi josparlap otyr. Sonymen qatar olar Hanwha Asset Management basqaratyn, somasy 1 mlrd dollardy quraıtyn qorǵa ınvestıtsııa salmaq. Bul qor jasandy ıntellekt, robototehnıka jáne qorǵanys tehnologııalary salasyndaǵy jobalarǵa baǵyttalady.
Son Che Il, Hanwha Aerospace kompanııasynyń bas dırektory, jasandy ıntellekttiń jekelegen salalardyń sheńberinen shyǵyp, qorǵanys salasy úshin jańa múmkindikter ashyp jatqanyn atap ótti. Onyń aıtýynsha, Krafton kompanııasymen seriktestik bolashaq qorǵanys tehnologııalarynda fızıkalyq jasandy ıntellektti qoldanýdyń jańa modelin qalyptastyrýy múmkin.
Al Kım Chan Han, Krafton basshysy, qurylatyn kompanııa ýaqyt óte kele jasandy ıntellekt negizindegi jańa býyn qarý-jaraǵyn ázirleıtin amerıkalyq Anduril Industries startapy sııaqty jahandyq qorǵanys tehnologııalary ázirleýshisine aınalýy múmkin ekenin aıtty. Onyń sózinshe, buǵan Krafton kompanııasynyń baǵdarlamalyq saraptamasy men Hanwha Aerospace kompanııasynyń óndiristik áleýetiniń úılesýi yqpal etedi.
Aıta keteıik, bıyldan bastap Ońtústik Koreıada JI qaýipsizdigi týraly zań kúshine endi.
