Ońtústik Koreıada qylmystyq jaýapkershilik jasy 13 jasqa deıin tómendeýi múmkin
ASTANA. KAZINFORM – Ońtústik Koreıa úkimeti qylmystyq jaýapkershilikke tartýdyń eń tómengi jasyn 14-ten 13 jasqa deıin tómendetý múmkindigin qarastyryp jatyr. Bul týraly Kazinform agenttiginiń menshikti tilshisi habarlady.
Qazir elde 14 jasqa tolmaǵan balalar qylmystyq jaýapkershilikke tartylmaıdy. Eger olar quqyq buzýshylyq jasasa, qoǵamdyq jumystarǵa tartý nemese kámeletke tolmaǵandarǵa arnalǵan arnaıy mekemelerge jiberý sekildi tárbıelik sharalar qoldanylady.
Jaýapkershilik jasyn tómendetý máselesi jasóspirimder qylmysynyń kóbeıýine baılanysty kóterilip otyr. Aqpan aıynda Prezıdent Lı Chje Men Úkimetke osy máselege qatysty qoǵamdyq pikirdi zerdeleýdi tapsyrǵan.
Genderlik teńdik jáne otbasy isteri mınıstrligi qylmystyq jaýapkershilikke tartý jasyn qazirgi «10–14 jas» sanatynan «10–13 jas» sanatyna ózgertý jóninde usynys engizdi. Jańa talaptardy aýyr, zorlyq-zombylyq sıpatyndaǵy nemese qaıtalanǵan qylmystarǵa qatysty qoldaný kózdelip otyr.
Mınıstrliktiń málimetinshe, 199 eresek adam men 43 jasóspirim qatysqan saýalnamada qylmystyq jaýapkershilik jasyn sózsiz tómendetýdi eresekterdiń 78 paıyzy, al kámeletke tolmaǵandardyń 67 paıyzy qoldaǵan.
Sonymen qatar qoǵamdyq talqylaý nátıjeleri bul máselege qatysty neǵurlym baıypty ustanymdy kórsetti. Talqylaýǵa qatysqan 212 adamnyń ishinde jas shegin belgili bir sharttarmen tómendetýdi qoldaýshylardyń úlesi 46,7 paıyzǵa deıin ósti. Al jas shegin eshqandaı shartsyz tómendetýdi qoldaýshylardyń úlesi 37,3 paıyzdan 30,2 paıyzǵa azaıdy. Qoldanystaǵy jasty saqtap qalýdy jaqtaıtyndardyń úlesi 5,7 paıyzdan 17 paıyzǵa deıin artqan.
Talqylaýǵa qatysýshylardyń 55,8 paıyzy qylmystyq jaýapkershilik jasyn bir jylǵa ǵana tómendetý qajet dep esepteıdi.
Budan bólek, mınıstrlik jasóspirimder qylmysynyń aldyn alý jáne kámeletke tolmaǵandardyń quqyq buzýshylyqtaryna den qoıý úshin jańa vedomstvoaralyq júıe qurýdy usyndy.
Eske salaıyq, buǵan deıin Ońtústik Koreıanyń Joǵarǵy soty burynǵy prezıdent ıÝn Sok Elge qatysty sot úkimin ózgerissiz qaldyryp, sot tóreligine kedergi keltirý isi boıynsha oǵan taǵaıyndalǵan jeti jyldyq bas bostandyǵynan aıyrý jazasyn túpkilikti bekitken bolatyn.
Sonymen qatar Seýl soty eks-prezıdentti saıası qorlar týraly zańdy buzǵany úshin kináli dep tanyp, oǵan qosymsha eki jyl bas bostandyǵynan aıyrý jazasyn taǵaıyndady.
