Ońtústik Koreıada Google men Apple-ǵa 47,6 mln dollar aıyppul salyndy
ASTANA. KAZINFORM – Ońtústik Koreıanyń retteýshi organy Google men Apple kompanııalaryna qosymsha ázirleýshileriniń tólem tásilderin tańdaýyna shekteý qoıǵany úshin jalpy somasy 63,7 mlrd von (47,6 mln dollar) aıyppul saldy, dep habarlaıdy Yonhap agenttigi.
Koreıanyń BAQ jáne kommýnıkatsııalar jónindegi komıssııasy Google kompanııasyna 42,9 mlrd von (32,3 mln dollar), al Apple-ǵa 20,81 mlrd von (15,5 mln dollar) aıyppul salý týraly sheshim qabyldady. Retteýshi organ eki kompanııanyń qosymshalar dúkenderiniń jumysyn retteıtin telekommýnıkatsııa týraly zańdy buzǵanyn anyqtaǵan.
Komıssııa aıyppuldan bólek, kompanııalardan zańbuzýshylyqtardy joıýdy talap etedi. Alaıda qylmystyq is qozǵaý týraly quqyq qorǵaý organdaryna júginbeıdi.
Tekserý qorytyndysyna sáıkes, Google men Apple naryqtaǵy basym jaǵdaıyn paıdalanyp, ázirleýshilerdi belgili bir tólem júıelerin qoldanýǵa májbúrlegen. Sondaı-aq ózge tólem servısterin paıdalanýǵa tıimsiz jaǵdaı jasaǵan.
Sheshim 2023 jylǵy qazanda bastalǵan tergeý rásiminen keıin, shamamen úsh jyl ótken soń qabyldandy.
Komıssııa ázirleýshilerge balama tólem tásilderin usynýǵa, sonyń ishinde qosymshalardyń ishine syrtqy tólem servısterine silteme ornalastyrýǵa ruqsat berýdi talap etti. Sondaı-aq syrtqy tólem júıelerin paıdalanǵany úshin alynatyn komıssııa negizdi bolýy kerek.
Google-dan úshinshi tarap servısteri arqyly tólem jasaýdyń qolaılylyǵyna qatysty nusqaýlyqtaryn qaıta qaraý talap etildi. Al Apple balama tólem tásilderin usyný úshin ázirleýshilerden jeke qosymsha tapsyrýdy talap etýdi toqtatýy tıis.
Eki kompanııa da tıisti nusqamalardy alǵannan keıin bir aı ishinde zańbuzýshylyqtardy joıý josparyn usynýǵa, al qajetti ózgeristerdi úsh aı ishinde iske asyrýǵa mindetti.
Google retteýshi organ kompanııanyń tólem saıasatyna engizilgen sońǵy ózgeristerdi eskermegenin málimdedi. Kompanııa naýryz aıynda syrtqy tólemderge ruqsat berip, komıssııa mólsherin azaıtý josparyn jarııalaǵan.
Apple da komıssııa sheshimimen kelispeıtinin bildirdi. Kompanııanyń málimdeýinshe, byltyr App Store ekojúıesi arqyly túsken tabystyń 90 paıyzdan astamy ázirleýshilerge qaıtarylǵan. Apple Ońtústik Koreıa zańnamasyn eskere otyryp, budan keıingi qadamdaryn qarastyratynyn habarlady.
Aıta keteıik, Irlandııada Google kompanııasy paıdalanýshylardyń geolokatsııasyn baqylaǵany úshin 403 mıllıon eýro aıyppul tóledi.
Al «Google salyǵy» Qazaqstan bıýdjetine 200 mlrd teńge qarjy ákeletini habarlandy.
