Ońtústik Koreıada birinshi synypqa baratyn balalar sany tarıhı eń tómengi deńgeıge túspek
ASTANA. KAZINFORM — 2027 jyly Ońtústik Koreıanyń bastaýysh mektepterine baratyn balalardyń sany alǵash ret 300 myńnan tómen bolýy múmkin, dep habarlaıdy The Korea Times.
Bıyl Ońtústik Koreıada bastaýysh mekteptiń birinshi synybyna 301 442 bala qabyldandy. Bul – 1964 jyly tıisti statıstıka júrgizile bastaǵaly bergi eń tómengi kórsetkish.
Koreı statıstıkalyq aqparat qyzmeti (KOSIS) men Koreı bilim berýdi damytý ınstıtýtynyń (KEDI) málimetinshe, kelesi oqý jylynda birinshi synypqa baratyn balalar sany kúrt azaıady. Olar – 2020 jyly dúnıege kelgen balalar. Sol jyly Ońtústik Koreıada 272 337 sábı týǵan. Bul 2019 jylmen salystyrǵanda 10 paıyz az.
Salystyrmaly túrde aıtsaq, 1968 jyly bastaýysh mekteptiń birinshi synybyna shamamen 1 mıllıon bala qabyldanǵan. Al 2027 jyly bul kórsetkish tórt ese az bolady dep boljanyp otyr.
Sondaı-aq mektep jasyndaǵy balalar sanynyń qysqarýy, ásirese aýyldyq jerlerdegi bilim berý uıymdarynyń jabylý qaýpin kúsheıtip, óńirler arasyndaǵy bilim sapasy alshaqtyǵynyń ulǵaıýyna alańdaýshylyq týǵyzdy.
Birinshi synypqa qabyldanatyn balalar sany 2030 jylǵa deıin tómendeı beredi dep boljanyp otyr. Alaıda kórsetkish 200 myńnan tómendemeıdi. Týý deńgeıiniń qaıta ósýi bul úrdisti birshama báseńdetýi múmkin.
Buǵan deıin Eýropada týý kórsetkishi tarıhı eń tómengi deńgeıge túskeni habarlanǵan bolatyn.
