Ońtústik Koreıada bıylǵy eń kúshti jer silkinisi tirkeldi

ASTANA. KAZINFORM – 17 qarashada Ońtústik Koreıanyń ońtústik-shyǵysynda magnıtýdasy 3,6 bolatyn jer silkinisi tirkeldi. Bul – elde jyl basynan beri bolǵan eń kúshti jer silkinisi, dep habarlaıdy Yonhap agenttigi.

Ońtústik Koreıada bıylǵy eń kúshti jer silkinisi tirkeldi
Foto: Pixabay

Koreıa meteorologııalyq basqarmasynyń málimetinshe, jerasty dúmpýleri jergilikti ýaqyt boıynsha saǵat 23:10 shamasynda Soltústik Kensan provıntsııasynda bolǵan.

Jer silkinisiniń epıtsentri Sanchjý qalasynyń ortalyǵynan soltústik-batysqa qaraı shamamen 22 shaqyrym jerde ornalasqan. Jer silkinisiniń oshaǵy 20 shaqyrym tereńdikte tirkeldi.

Bastapqyda seısmologtar jer silkinisiniń magnıtýdasyn 3,7 dep baǵalaǵan. Alaıda qosymsha taldaýdan keıin kórsetkish 3,6-ǵa deıin tómendetildi.

Bul – osy jyldyń basynan beri Koreı túbegi men oǵan irgeles akvatorııalarda tirkelgen 58 jer silkinisiniń ishindegi eń kúshtisi.

Óńirde magnıtýdasy 3,5-ten joǵary aldyńǵy jer silkinisi shamamen bir jarym jyl buryn, ótken jylǵy 5 mamyrda bolǵan. Ol kezde Ońtústik Chhýnchhon provıntsııasyndaǵy Tean qalasynan soltústik-batysqa qaraı 52 shaqyrym jerde teńizde magnıtýdasy 3,7 bolatyn jerasty dúmpýleri tirkelgen.

Zardap shekkender men qıraǵan nysandar týraly aqparat jarııalanǵan joq.

Aıta keteıik, buǵan deıin 17 qarashada Tájikstan men Aýǵanstan shekaralas aımaǵynda magnıtýdasy 4,2 bolatyn jer silkinisi bolǵany habarlandy.