Ońtústik Koreıada ata-anasyn óltirgenderge qatań jaza saqtaldy
ASTANA. KAZINFORM — Ońtústik Koreıanyń Konstıtýtsııalyq soty ata-anasyn jáne ata-tegindegi basqa da týystaryn óltirgeni úshin qatań jaza taǵaıyndaýdy kózdeıtin normany Konstıtýtsııaǵa qaıshy emes dep tanydy, dep habarlaıdy Kazinform agenttigi Agenzia Nova-ǵa silteme jasap.
Sheshim 22 qazanda segiz sýdıanyń qoldap, bir sýdıanyń qarsy daýys berýimen qabyldandy. Sot Qylmystyq kodekstiń 250-babynyń 2-bóligin qarastyrdy. Bul norma jubaıynyń ata-anasyn jáne ata-tegindegi basqa da týystaryn óltirý jaǵdaılaryna da qoldanylady.
Zańda ólim jazasy, ómir boıyna bas bostandyǵynan aıyrý nemese keminde jeti jylǵa bas bostandyǵynan aıyrý jazasy qarastyrylǵan. Al kisi óltirýdiń jalpy jaǵdaıynda eń tómengi jaza merzimi — bes jyl.
Sottyń pikirinshe, ata-anasyn nemese ata-tegindegi basqa da týystaryn óltirgenderge qatań jaza taǵaıyndaý mundaı qylmystyń qoǵam tarapynan erekshe aıyptalýymen baılanysty bolyp otyr. Sýdıalar zań shyǵarýshynyń ata-ana men urpaq arasyndaǵy adamgershilik qundylyqtardy qorǵaý maqsatyn oryndy dep tapty. Sondaı-aq mundaı qylmys ata-ana men bala arasyndaǵy erekshe baılanysty buzyp, otbasynyń negizine nuqsan keltiretinin atap ótti.
Qarsy daýys bergen jalǵyz sýdıa Ma Yn Hek boldy. Onyń pikirinshe, zańda mundaı qylmystardyń jasalý sebepteri men mán-jaılary tolyq eskerilmegen. Keıbir adamdar týysyn paıdakúnemdik maqsatpen óltirse, endi bireýler mundaı qadamǵa jyldar boıy kórgen zorlyq-zombylyq pen qatygezdikke shydamaı, ashý-yzaǵa boı aldyrýy múmkin. Sondyqtan sýdıa týysyn óltirgen adamnyń kinási basqa kisi óltirý qylmysyn jasaǵan adamnyń kinásinen mindetti túrde aýyr dep aıtýǵa bolmaıtynyn atap ótti.
Sýdıanyń aıtýynsha, sot jazany jeńildetetin mán-jaılardy eskerip, jeti jyldyq eń tómengi merzimdi eki ese qysqartqan kúnniń ózinde, sottalýshy úsh jyl alty aıǵa bas bostandyǵynan aıyrylady. Sondyqtan jazany jeńildetýge múmkindik beretin basqa negizder bolmasa, shartty jaza taǵaıyndaý múmkin emes.
Sottyń qaraýyna aýyr naýqas ákesin óltirgeni úshin sottalǵan adamnyń konstıtýtsııalyq shaǵymy sebep boldy. 2021 jyly ol ákesine kútim jasap, em-domyna ketetin shyǵyndardy tóleý kezinde qıyndyqtarǵa tap bolǵan. Aqyrynda ákesine tamaq pen sý berýdi toqtatyp, sonyń saldarynan ákesi qaıtys bolǵan.
Ol ákesin óltirgeni úshin tórt jylǵa bas bostandyǵynan aıyryldy. Úkimge shaǵymdanǵan kezde Joǵarǵy sottan isti Konstıtýtsııalyq sottyń qaraýyna jiberýdi surady. Alaıda ótinishi qanaǵattandyrylmaı, úkim ózgerissiz qaldy. 2022 jylǵy mamyrda ol Konstıtýtsııalyq sotqa shaǵym túsirdi.
Konstıtýtsııalyq sot bul normany buǵan deıin de, 2013 jylǵy shildede, Konstıtýtsııaǵa qaıshy emes dep tanyǵan. Ol kezde sheshimdi jeti sýdıa qoldap, ekeýi qarsy daýys bergen.
Eske salaıyq, buǵan deıin Ońtústik Koreıa prezıdenti Lı Chje Men polıtsııa jumysyndaǵy kemshilikterdi joıyp, polıtsııa tergeýlerin tekseretin táýelsiz júıe qurý qajet ekenin aıtqan edi.
