Ońtústik Koreıada aryqtatatyn dárilerdi zańsyz ákelý úsh eseden asa artyp ketken
ASTANA. KAZINFORM – Ońtústik Koreıada Wegovy jáne Mounjaro sııaqty aryqtaýǵa arnalǵan preparattardy shetelden zańsyz ákelý derekteri bıylǵy birinshi jartyjyldyqta 2025 jylǵy jalpy kórsetkishten úsh eseden astam artty. Bul týraly Kyodo News jazdy.
Koreıa keden qyzmetiniń málimetinshe, qańtar-maýsym aralyǵynda preparattardy shetelden tikeleı satyp alý jáne basqa da zańsyz joldarmen elge kirgizýdiń 4155 deregi anyqtalǵan. Al 2025 jyly mundaı 1189 jaǵdaı tirkelgen.
Sonymen qatar bıylǵy alǵashqy alty aıda Wegovy jáne Mounjaro preparattarynyń 391 qoraby kedennen zańdy túrde ótkizilgen. Byltyr jyl boıy bul kórsetkish 191 qorap bolǵan.
Zańsyz tasymaldyń basym bóligi poshta arqyly júzege asyrylǵan. Buǵan sheteldik ınternet-dúkenderden aryqtaýǵa arnalǵan dári satyp alyp, halyqaralyq poshta arqyly tapsyrys beretinder sanynyń artýy sebep bolyp otyr.
Bıylǵy birinshi jartyjyldyqta keden qyzmeti Wegovy jáne Mounjaro preparattary bar 3489 zańsyz poshta jóneltilimin anyqtady. Bul 2025 jylǵy 1046 jaǵdaımen salystyrǵanda úsh eseden astam kóp.
Budan bólek, preparattardy jolaýshylardyń jeke alyp ótýine qatysty 656 jaǵdaı tirkelgen. Byltyr mundaı 134 derek anyqtalǵan. Wegovy jáne Mounjaro preparattaryn jolaýshylardyń qol júgimen elge ákelýge tyıym salynǵan.
– Wegovy jáne Mounjaro preparattaryn ruqsatsyz ákelý – Keden týraly zańdy óreskel buzý jáne ol úshin jaza qarastyrylǵan. Biz qaýipti farmatsevtıkalyq preparattardyń shekara arqyly zańsyz tasymaldanýyna qatań tosqaýyl qoıamyz, – dedi keden qyzmetiniń ókili.
Eske sala ketsek, Úndistanda hımıoterapııany almastyrýy múmkin qaterli isikke qarsy preparat ázirlengenin jazdyq.
