Ońtústik Koreıada aptap ystyqtan 20-dan astam adam qaıtys boldy
ASTANA. KAZINFORM – Ońtústik Koreıa prezıdenti Lı Chje Men beısenbi kúni úkimetke elde aptap ystyqtan keltirilgen zalaldy azaıtý úshin barlyq resýrsty jumyldyrýdy tapsyrdy, dep habarlaıdy Yonhap aqparat agenttigi.
Ońtústik Koreıada jyl basynan beri aptap ystyqtan 21 ólim tirkeldi. Bul ótken jylǵy kórsetkishten asyp tústi, ol kezde joǵary temperatýranyń áserinen 20 adam qaıtys bolǵan.
Mamyr aıynyń ortasynan bastap aptap ystyqqa baılanysty aýrýlardy baqylaý júıesi iske qosylǵannan keıin jedel járdem kómegine 2441 adam júgindi.
Ońtústik Koreıanyń Ulttyq meteorologııalyq qyzmeti jalǵasyp jatqan aptap ystyq aıasynda Seýl astanalyq aımaǵy úshin aýa raıyna baılanysty qosymsha eskertý jarııalady. Qazirgi ýaqytta aımaq aýmaǵynyń 43%-y eskertýdiń eń joǵary deńgeıinde.
Sınoptıkter boljamynsha, Seýldegi temperatýra 6 tamyzda 39°C-qa deıin jetýi múmkin.
Eske salsaq, Ońtústik Koreıanyń kóp bóliginde temperatýra 40°C-qa jaqyndady, eldiń ońtústik-shyǵysyndaǵy ıAnsan qalasynda jeksenbide 42,5°C.eń joǵary temperatýra tirkeldi.
Bıylǵy shilde aıy baqylaý tarıhynda eń ystyq jyldardyń biri boldy: el boıynsha ortasha temperatýra 26,8°C-qa jetti. Bul - tarıhta úshinshi eń joǵary kórsetkish.
Budan basqa, elde orta eseppen 9,7 tropıkalyq tún tirkeldi — bul túngi aýa temperatýrasy 25°C-tan tómendemeıtin kezeńder. Koreıa meteorologııalyq basqarmasynyń (KMA) málimetinshe, bul jańa rekord. Aldyńǵy kórsetkish 2024 jyldyń shildesinde 8,8 tún jáne 1994 jyldyń shildesinde 8,5 tún bolǵan.
Osyǵan deıin Japonııada aptap ystyqtan bir aptada 7 adam kóz jumǵanyn habarladyq.
