Ońtústik Koreıada Alatau City-de iri jobalardy iske asyrý múmkindigi talqylandy
ASTANA. KAZINFORM — Koreıa Respýblıkasyna jumys sapary aıasynda Qazaqstan Respýblıkasy Premer-Mınıstriniń orynbasary Qanat Bozymbaev Korea Electric Power Corporation (KEPCO), Lotte Hotels & Resorts, Doosan Enerbility jáne Global Green Growth Institute (GGGI) basshylyǵymen kezdesý ótkizdi.
Taraptar koreı kompanııalarynyń Alatau City-degi ınfraqurylymdyq jáne ınvestıtsııalyq jobalardy iske asyrýǵa qatysýyn talqylady.
Kelissózder barysynda Qanat Bozymbaev qazaqstandyq-koreı strategııalyq áriptestiginiń joǵary deńgeıin jáne jańa qalany damytý úshin ozyq tehnologııalardy, ınvestıtsııalardy jáne halyqaralyq saraptamany tartýǵa múddeliligin atap ótti.
— Alatau City — Qazaqstannyń basty ulttyq jobalarynyń biri. Búginde qala úshin arnaýly ınvestıtsııalyq jáne retteýshilik orta qalyptastyrylyp, zamanaýı ınfraqurylym qurylýda. Biz jetekshi koreı kompanııalarymen uzaq merzimdi áriptestikke múddelimiz jáne birlesken jobalardy naqty pysyqtaýǵa daıynbyz, — dep atap kórsetti Qanat Bozymbaev.
KEPCO-men kezdesýde Alatau City-diń energetıkalyq ınfraqurylymyn damytý boıynsha yntymaqtastyq perspektıvalary qaraldy. Atap aıtqanda, koreı korporatsııasynyń elektr energııasyn berý jáne taratý júıelerin jobalaýǵa, qosalqy stansalar salýǵa, ulttyq energııa júıesimen ıntegratsııalaýǵa jáne jergilikti elektr jelilerin qosýǵa qatysýy talqylandy.
Doosan Enerbility jáne GGGI basshylyǵymen Alatau City-diń menshikti generatsııasyn damytý máseleleri talqylandy. Perspektıvaly baǵyttardyń biri retinde qýaty 2×250 MVt bolatyn, keıinnen sýtegige kóshý múmkindigi bar gaz elektr stansasyn salý qarastyrylýda.
Jobany memlekettik-jekeshelik áriptestik tetikterin qoldana otyryp iske asyrý aldyn ala qarastyrylýda.
Sondaı-aq týrıstik jáne qonaqúı ınfraqurylymyn damytý máseleleri talqylandy. Lotte Hotels & Resorts kompanııasymen Alatau City-de L7 by Lotte qonaqúıi bar kópfýnktsıonaldy keshendi iske asyrý múmkindigi talqylandy. Quny $200 mln-nan asatyn joba 180 nómirli qonaqúıdi, keńse keńistikterin jáne turǵyn apartamentterdi kózdeıdi.
Kezdesýler qorytyndysy boıynsha taraptar talqylanǵan jobalar boıynsha, onyń ishinde olardy qarjylandyrý jáne iske asyrý tetikterin aıqyndaý jóninde birlesken jumysty jalǵastyrýǵa kelisti. Alatau City Authority bul jumysty salalyq memlekettik organdarmen jáne áleýetti seriktestermen birlesip úılestirýdi jáne súıemeldeýdi qamtamasyz etedi. Qazirgi ýaqytta Alatau City-diń ınvestıtsııalyq portfeli jalpy quny $6,9 mlrd bolatyn, iske asyrylýy 55 myńnan astam jumys ornyn qurýdy kózdeıtin 67 jobany qamtıdy.
Talqylanyp jatqan jobalardy iske asyrý Alatau City-diń keshendi damýyna, atap aıtqanda, senimdi energetıkalyq jáne ınjenerlik ınfraqurylymdy qalyptastyrýǵa, qonaqúı, iskerlik jáne kommertsııalyq nysandardy damytýǵa yqpal etedi. Halyqaralyq seriktesterdi tartý jáne jańa ınvestıtsııalyq jobalardy iske asyrý qosymsha jumys oryndaryn ashýǵa, qalalyq qyzmetterdiń aıasyn keńeıtýge, sondaı-aq iskerlik belsendiliktiń ósýine jáne qalalyq ortanyń sapasyn arttyrýǵa jaǵdaı jasaıdy.
Aıta ketelik Alatau City tsıfrlyq egizin jasaýǵa ońtústikkoreıalyq kompanııalar kómektesetini týraly jazǵan edik.
