Ońtústik Koreıada 470 myńnan astam derek jelige tarap ketti: bankterge tekseris bastaldy
ASTANA. KAZINFORM — Sońǵy bir aıda Ońtústik Koreıa bankteriniń, saqtandyrýshy kompanııalarynyń jáne ınvestıtsııalyq kompanııalardyń derekteri jelige tarady, qarjy uıymdary jalpy 40 márte osyndaı qıyndyqqa tap bolǵan. Bul týraly Yonhap agenttigi habarlady.
Qarjy qyzmetteri jónindegi komıssııanyń (FSC) málimetinshe, derektiń taraǵany alǵash ret 30 qyrkúıekte anyqtalǵan. Zardap shekken uıymdardyń qatarynda tórt kommertsııalyq bank, bes ınvestıtsııalyq fırma, úsh saqtandyrý kompanııasy jáne bes jınaq banki bar. Jalpy alǵanda, jeke derekterdi qamtıtyn 470 000-nan astam jazba jarııa bolǵan.
Komıssııa tarap ketken derekterdiń quramynda zańsyz qarjylyq operatsııalardy júzege asyrýǵa paıdalanýǵa bolatyndaı mańyzdy aqparattardyń (mysaly, klıentterdiń aty-jóni, jeke sáıkestendirý nómirleri nemese bank shottarynyń nómirleri) joq ekenin naqtylady.
Urlanǵan qarajat kólemi shamamen 1 mıllıard vonǵa (745 000 AQSh dollary) baǵalanyp otyr. Bul qarajat birneshe shaǵyn brokerlik, saqtandyrý jáne onlaın qarjy fırmalarynan alynǵan, al olardyń klıentterine tıesili qarajatqa eshqandaı zııan kelmegeni aıtyldy.
Qarasha aıynyń sońyna deıin FSC 580 qarjy kompanııasynda qaýipsizdik aýdıtin júrgizip, olardyń ishki qaýipsizdikti baqylaý júıelerin tekseredi.
Bul jaǵdaıdy talqylaý úshin Komıssııa qarjy salasy qaýymdastyqtarynyń ókilderimen, Qarjylyq qadaǵalaý qyzmeti, Qarjylyq qaýipsizdik ınstıtýty sekildi memlekettik mekemelermen arnaıy jıyn ótkizdi. Qatysýshylar derekterdi qorǵaý júıelerin jáne qarjy sektorynda jasandy ıntellektini (JI) qoldaný múmkindikterin qarastyrdy.
— Biz belgili bir qaýipsizdik táýekelderine nemquraıly qaraý, basqarýshylyq mindetterdi oryndamaý, tekserýlerdi formaldy túrde júrgizý nemese salǵyrttyq tanytý saldarynan oryn alǵan oqıǵalarǵa nemese zııannyń ulǵaıýyna ákeletin áreketterge jol bermeımiz, — dep málimdedi FSC tóraǵasy Lı Ok Von.
Onyń aıtýynsha, basqarýdaǵy eleýli kemshilikter nemese salǵyrttyq úshin kompanııa basshylyǵy, sonyń ishinde bas dırektor da zań aldynda qatań jaýapkershilikke tartylady.
Buǵan deıin Ońtústik Koreıa polıtsııasy prezıdent Lı Chje Men, onyń jubaıy, mınıstrler, jolaýshylar, jalpy 168 adamnyń jeke dereginiń ınternetke tarap ketýine qatysty aldyn ala tergeý bastaǵanyn habarlaǵan edik.
