Ońtústik Koreıada 15 qarjy kompanııasyna 1,2 mlrd dollar aıyppul salynbaq
ASTANA. KAZINFORM — Ońtústik Koreıada 15 bank pen qarjy kompanııasyna memlekettik oblıgatsııalar saýdasynda ózara sóz baılasqany úshin jalpy somasy 1,62 trln von (shamamen 1,2 mlrd dollar) aıyppul salynady. Bul týraly Yonhap agenttigi habarlady.
Ádil saýda komıssııasynyń málimetinshe, 2020 jylǵy qańtardan 2023 jylǵy maýsymǵa deıin kompanııalar memlekettik oblıgatsııalardy qandaı baǵamen jáne qandaı kólemde satyp alýdy josparlap otyrǵany týraly aqparat almasyp kelgen.
Zań buzýshylyqtar 150 aýktsıon barysynda anyqtalǵan. Sonyń 145-inde qatysýshylar bir-birimen básekelesýdiń ornyna, ótinim sharttaryn aldyn ala kelisip alǵan.
Mundaı kelisimderdiń saldarynan memleket qaryz qarajatyn joǵary paıyzben tartýǵa májbúr bolǵan. Bul bıýdjet shyǵynyn arttyryp keldi.
Salynatyn aıyppuldardyń jalpy kólemi Ońtústik Koreıanyń monopolııaǵa qarsy organynyń tarıhyndaǵy eń joǵary kórsetkish bolmaq. Eń iri aıyppul KB Securities kompanııasyna salyndy. Ol 332,1 mlrd von tóleýge tıis. Al NH Investment & Securities kompanııasyna 242,7 mlrd von aıyppul belgilengen.
Budan bólek, 7 kompanııaǵa qatysty materıaldar qosymsha tergeý júrgizý úshin quqyq qorǵaý organdaryna joldanady.
Eske sala keteıik, buǵan deıin Ońtústik Koreıada Google men Apple-ǵa 47,6 mln dollar aıyppul salyndy.
