Ońtústik Koreıa joǵary tehnologııa mamandaryna «joǵary deńgeıli vıza» engizedi
ASTANA.KAZINFORM - Koreıa osy aıda jartylaı ótkizgishter men elektr kólikteriniń akkýmýlıatorlary sııaqty salalar boıynsha sheteldik mamandarǵa elde turaqty turýdy qamtamasyz etý jáne jyldam vıza alý úshin jańa vızalyq baǵdarlamany iske qosady, dep habarlaıdy The Korea Times.

«Top-tier Visa» (joǵary deńgeıli vıza) júıesi aıasynda belgili bir salalarda segiz jyldyq tájirıbesi bar sheteldik mamandar jáne olardyń otbasylary Ońtústik Koreıada úsh jyl jumys isteýge quqyq beretin F-2 vızasyn ala alady, keıinnen turaqty turýǵa ruqsat alý múmkindigi bar.
— Sheteldik jumys kúshin paıdalaný endi tańdaý emes, demografııalyq jáne ekonomıkalyq ózgeristerge beıimdelý, sondaı-aq ekonomıka men qoǵamdy nyǵaıtý qajettiligi, - dedi prezıdenttiń mindetin atqarýshy Chhve San MOK.
Potentsıaldy úmitkerler álemdegi eń úzdik 100 ýnıversıtettiń biriniń ǵylymı dárejesine ıe bolýy kerek, 500 iri kompanııanyń birinde keminde úsh jyl jumys tájirıbesi bolýy kerek. Sonymen qatar, olardyń Koreıadaǵy kompanııalar tóleıtin jyldyq syıaqysy jan basyna shaqqandaǵy jalpy ulttyq kiristen keminde úsh ese kóp bolýy kerek — shamamen 140 mıllıon von nemese odan joǵary (9 96,000).
Sonymen qatar, Ońtústik Koreıany jas sheteldik mamandarǵa tartymdy etý úshin Úkimet ýnıversıtettiń jetekshi ǵylymı baǵdarlamalarynyń túlekterine D-10 vızasyn berýge nıetti, bul olarǵa eki jyl boıy jumysqa ornalasýǵa múmkindik beredi.
Baǵdarlamada eń jaqsy mektepterdi anyqtaý úshin qandaı krıterııler qoldanylatyny, vıza aldaǵy aptalarda resmı túrde iske qosylǵannan keıin jarııalanady.
Basqa elderden jas mamandardy tartý úshin Úkimet «youth dream visa» (jastardyń arman vızasy) engizedi, onyń kómegimen «Dostyq elderdiń jas azamattary» kásibı daıyndyqtan, taǵylymdamadan ótip, Koreıada jumysqa ornalasa alady.
Osyǵan deıin Ońtústik Koreıa sheteldikter úshin elektrondy karta júıesin engizgenin habarlaǵan edik.