Ońtústik Koreıa jastary 30 jylda teń jartyǵa azaıady

Koreıa statıstıka agenttiginiń boljamy boıynsha, turǵyndardyń tez qartaıyp, týý kórsetkishiniń tómendeýine baılanysty ońtústikkoreıalyqtar jastar sany 30 jylda eki esege azaıady. Kazinform bul týraly Yonhap agenttigine silteme jasap habarlaıdy.

Koreıada 19-34 jas aralyǵyndaǵy adamdar sany 2020 jyly 10,21 mln bolǵan. 2050 jylǵa qaraı bul kórsetkish 5,21 mln adamǵa deıin azaıady degen boljam bar.

2020 jyly jastardyń úlesi 20,4% bolǵan, biraq 2050 jylǵa 11%-ke deıin tómendeýi múmkin, dep atap ótti agenttik.

Keıingi onjyldyqta osy jas sanatyndaǵylar arasynda úılenbegen jigitter men turmysqa shyqpaǵan qyzdar sany artyp otyrdy. 2020 jyly 7,84 mln jas nekege turmaǵan, bul – osy jastaǵy turǵyndardyń 81,5%-i. Kórsetkish 2000 jyly 54,5%, 2010 jyly 68,9% boldy.

Sonymen qatar Ońtústik Koreıada jumys isteıtin áıelder sany artty. Olardyń úlesi 2000 jyly 42,3%-ten 2020 jyly 61,1%-ke deıin kóbeıdi.

Týý kórsetkishi 2023 jyly rekordtyq tómen nátıje - 0,7 kórsetti.